Исаии, глава 66
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТכֹּ֚ה אָמַ֣ר יְהוָ֔ה הַשָּׁמַ֣יִם כִּסְאִ֔י וְהָאָ֖רֶץ הֲדֹ֣ם רַגְלָ֑י אֵי זֶ֥ה בַ֙יִת֙ אֲשֶׁ֣ר תִּבְנוּ לִ֔י וְאֵי זֶ֥ה מָק֖וֹם מְנוּחָתִֽי 1Qisaaכוה אמר יהוה השמים כסאי והארץ הדום רגלי איזה בית אשר תבנו ליא ואיזה מקום מנוחתי 1Q8כה אמר יהוה [השמים] [כסאי] והארץ [הדם] רגלי איזה בית אשר תבנו לי ואיזה [מקום] מנחתי
2МТוְאֶת כָּל אֵ֙לֶּה֙ יָדִ֣י עָשָׂ֔תָה וַיִּהְי֥וּ כָל אֵ֖לֶּה נְאֻם יְהוָ֑ה וְאֶל זֶ֣ה אַבִּ֔יט אֶל עָנִי֙ וּנְכֵה ר֔וּחַ וְחָרֵ֖ד עַל דְּבָרִֽי 1Qisaaואת כול אלה ידי עשתה והיו כול אלה נואם יהוה ואל זה אביט אל עניא ונכאי רוח והחורד לדברי 1Q8ואת כל אלה ידי עשתה ויהיו כל [אלה] נאם יהוה ואל זה אביט אל עני ונכאה רוח וחרד אל דברי
3МТשׁוֹחֵ֨ט הַשּׁ֜וֹר מַכֵּה אִ֗ישׁ זוֹבֵ֤חַ הַשֶּׂה֙ עֹ֣רֵֽף כֶּ֔לֶב מַעֲלֵ֤ה מִנְחָה֙ דַּם חֲזִ֔יר מַזְכִּ֥יר לְבֹנָ֖ה מְבָ֣רֵֽךְ אָ֑וֶן גַּם הֵ֗מָּה בָּֽחֲרוּ֙ בְּדַרְכֵיהֶ֔ם וּבְשִׁקּוּצֵיהֶ֖ם נַפְשָׁ֥ם חָפֵֽצָה 1Qisaaשוחט השור כמכה איש זובח השא עורפ כלב מעלה מנחה דמ חוזיר מזכיר לבונה מברך און גמ המה בחרו בדרכיהמה ובשקוציהמה נפשמה חפצה 1Q8שוחט השור מכה איש [זובח] שה עורף כלב מעלה מנחה דם חזיר [מזכיר] לבנה מברך און גם המה בחרו בדרכיהם [ובשקוציהם] נפשם חפצה
4МТגַּם אֲנִ֞י אֶבְחַ֣ר בְּתַעֲלֻלֵיהֶ֗ם וּמְגֽוּרֹתָם֙ אָבִ֣יא לָהֶ֔ם יַ֤עַן קָרָ֙אתִי֙ וְאֵ֣ין עוֹנֶ֔ה דִּבַּ֖רְתִּי וְלֹ֣א שָׁמֵ֑עוּ וַיַּעֲשׂ֤וּ הָרַע֙ בְּעֵינַ֔י וּבַאֲשֶׁ֥ר לֹֽא חָפַ֖צְתִּי בָּחָֽרוּ 1Qisaaגמ אני אבחר בתעלוליהמה ובמגורותיהםה אביא להמה יען קראתי ואין עונה דברתי ולוא שמעו ויעשו את הרע בעיני ובאשר לוא חפצתי בחרו 1Q8גם אני אבחר בתעלליהם במגרתם אביא להם יען קראתי ואין עונה דברתי ולא שמעו ויעשו הרע בעיני ובאשר [לא] חפצתי בחרו
5МТשִׁמְעוּ֙ דְּבַר יְהוָ֔ה הַחֲרֵדִ֖ים אֶל דְּבָר֑וֹ אָמְרוּ֩ אֲחֵיכֶ֨ם שֹׂנְאֵיכֶ֜ם מְנַדֵּיכֶ֗ם לְמַ֤עַן שְׁמִי֙ יִכְבַּ֣ד יְהוָ֔ה וְנִרְאֶ֥ה בְשִׂמְחַתְכֶ֖ם וְהֵ֥ם יֵבֹֽשׁוּ 1Qisaaשמעו דבר יהוה החרדים אל דבריו אמרו אחיכמה שונאיכמה מנדיכם למען שמי יכבד יהוה יראה בשמחתכמה והמה יבושו 1Q8שמעו דבר [יהוה] [חרדים] [אל] [דברו] אמרו אחיכם שנאיכם [מנדיכם] למען שמי יכבד [יהוה] [נראה]
6МТק֤וֹל שָׁאוֹן֙ מֵעִ֔יר ק֖וֹל מֵֽהֵיכָ֑ל ק֣וֹל יְהוָ֔ה מְשַׁלֵּ֥ם גְּמ֖וּל לְאֹיְבָֽיו 1Qisaaקול שאון בעיר קול מהיכל קול יהוה משלם גמול לאויביו
7МТבְּטֶ֥רֶם תָּחִ֖יל יָלָ֑דָה בְּטֶ֨רֶם יָב֥וֹא חֵ֛בֶל לָ֖הּ וְהִמְלִ֥יטָה זָכָֽר 1Qisaaבטרם תחיל ילדה בטרם יבוא חבל לה המליטה זכר
8МТמִֽי שָׁמַ֣ע כָּזֹ֗את מִ֤י רָאָה֙ כָּאֵ֔לֶּה הֲי֤וּחַל אֶ֙רֶץ֙ בְּי֣וֹם אֶחָ֔ד אִם יִוָּ֥לֵֽד גּ֖וֹי פַּ֣עַם אֶחָ֑ת כִּֽי חָ֛לָה גַּם יָלְדָ֥ה צִיּ֖וֹן אֶת בָּנֶֽיהָ 1Qisaaמיא שמע כזואת ומיא יראה כאלה התחיל ארץ ביום אחד אמ יולד גוי פעם אחת כיא חלה גמ ילדה ציון את בניהא 1Q8[זאת] מי ראה כאלה היוחל פעם אחת כי את בניה
9МТהַאֲנִ֥י אַשְׁבִּ֛יר וְלֹ֥א אוֹלִ֖יד יֹאמַ֣ר יְהוָ֑ה אִם אֲנִ֧י הַמּוֹלִ֛יד וְעָצַ֖רְתִּי אָמַ֥ר אֱלֹהָֽיִךְ 1Qisaaהאני אשביר ולוא אוליד יואמר יהוה אמ אניא המוליד ואעצורה אמר אלוהיך 1Q8האני [אשביר] [מוליד] ועצרתי [אלהיך]
10МТשִׂמְח֧וּ אֶת יְרוּשָׁלִַ֛ם וְגִ֥ילוּ בָ֖הּ כָּל אֹהֲבֶ֑יהָ שִׂ֤ישׂוּ אִתָּהּ֙ מָשׂ֔וֹשׂ כָּל הַמִּֽתְאַבְּלִ֖ים עָלֶֽיהָ 1Qisaaשמחו את ירושלים וגילו בהא כול אוהביהא שישו אתה משוש כול המתאבלים עליהא
11МТלְמַ֤עַן תִּֽינְקוּ֙ וּשְׂבַעְתֶּ֔ם מִשֹּׁ֖ד תַּנְחֻמֶ֑יהָ לְמַ֧עַן תָּמֹ֛צּוּ וְהִתְעַנַּגְתֶּ֖ם מִזִּ֥יז כְּבוֹדָֽהּ 1Qisaaלמען תינקו ושבעתמה משד תנחומיהא למען תמוצו והתענגתמה ממזוז כבודה 1Q8למען [תינקו] משד [תנחמיה] [התענגתם] מזיז
12МТכִּֽי כֹ֣ה אָמַ֣ר יְהוָ֗ה הִנְנִ֣י נֹטֶֽה אֵ֠לֶיהָ כְּנָהָ֨ר שָׁל֜וֹם וּכְנַ֧חַל שׁוֹטֵ֛ף כְּב֥וֹד גּוֹיִ֖ם וִֽינַקְתֶּ֑ם עַל צַד֙ תִּנָּשֵׂ֔אוּ וְעַל בִּרְכַּ֖יִם תְּשָׁעֳשָֽׁעוּ 1Qisaa[כיא] כוה אמר יהוה הנני נוטה אליהא כנהר שלום וכנחל שוטפ כבוד גואים [יונקותיהמה] על צד תנשינה ועל בורכים תשתעשעו 1Q8[יהוה] הנני [נוטה] שלום [וכנחל] [גוים] וינקתם על [ברכים] תשתעשעו
13МТכְּאִ֕ישׁ אֲשֶׁ֥ר אִמּ֖וֹ תְּנַחֲמֶ֑נּוּ כֵּ֤ן אָֽנֹכִי֙ אֲנַ֣חֶמְכֶ֔ם וּבִירֽוּשָׁלִַ֖ם תְּנֻחָֽמוּ 1Qisaaכאיש אשר אמו [תנחמנו] כן אנוכי אנחמכמה ובירושלים תתנחמו
14МТוּרְאִיתֶם֙ וְשָׂ֣שׂ לִבְּכֶ֔ם וְעַצְמוֹתֵיכֶ֖ם כַּדֶּ֣שֶׁא תִפְרַ֑חְנָה וְנוֹדְעָ֤ה יַד יְהוָה֙ אֶת עֲבָדָ֔יו וְזָעַ֖ם אֶת אֹיְבָֽיו 1Qisaaוראיתמה ושש לבכמה ועצמותיכמה כדשא תפרחנה ונודע יד יהוה את עבדיו וזעם את איביו 1Q8[ראיתם] ושש לבכם [ועצמותיכם] [דשא] תפרחנה [ונודעה] יהוה [את] עבדיו וזעם את
15МТכִּֽי הִנֵּ֤ה יְהוָה֙ בָּאֵ֣שׁ יָב֔וֹא וְכַסּוּפָ֖ה מַרְכְּבֹתָ֑יו לְהָשִׁ֤יב בְּחֵמָה֙ אַפּ֔וֹ וְגַעֲרָת֖וֹ בְּלַהֲבֵי אֵֽשׁ 1Qisaaכיא הנה יהוה באש יבוא ובסופה מרכבותיו להשיב בחמה אפו אפו וגערתיו בלהבי אש
16МТכִּ֤י בָאֵשׁ֙ יְהוָ֣ה נִשְׁפָּ֔ט וּבְחַרְבּ֖וֹ אֶת כָּל בָּשָׂ֑ר וְרַבּ֖וּ חַֽלְלֵ֥י יְהוָֽה 1Qisaaכיא באש יהוה יבוא לשפוט ובחרבו את כול הבשר ורבו חלליו
17МТהַמִּתְקַדְּשִׁ֨ים וְהַמִּֽטַּהֲרִ֜ים אֶל הַגַּנּ֗וֹת אַחַ֤ר אַחַת֙ בַּתָּ֔וֶךְ אֹֽכְלֵי֙ בְּשַׂ֣ר הַחֲזִ֔יר וְהַשֶּׁ֖קֶץ וְהָעַכְבָּ֑ר יַחְדָּ֥ו יָסֻ֖פוּ נְאֻם יְהוָֽה 1Qisaaהמתקדשים והמטהרים אל הגנות אחר אחת בתוך אוכלי בשר החוזיר והשקוץ והעכבר יחדיו אמר יהוה 1Q8[המתקדשים] [מטהרים] אל [הגנות] [אחת] בתוך אכלי בשר [החזיר] והעכבר יחדו יהוה
18МТוְאָנֹכִ֗י מַעֲשֵׂיהֶם֙ וּמַחְשְׁבֹ֣תֵיהֶ֔ם בָּאָ֕ה לְקַבֵּ֥ץ אֶת כָּל הַגּוֹיִ֖ם וְהַלְּשֹׁנ֑וֹת וּבָ֖אוּ וְרָא֥וּ אֶת כְּבוֹדִֽי 1Qisaaואנוכי מעשיהמה ומחשבותיהמה באו לקבץ את כול הגואים והלשונות ובאו וראו את כבודי 1Q8[ואנכי] [ומחשבתיהם] באה [לקבץ] [גוים] והלשנות [ובאו] ו [את] [כבודי]
19МТוְשַׂמְתִּ֨י בָהֶ֜ם א֗וֹת וְשִׁלַּחְתִּ֣י מֵהֶ֣ם פְּ֠לֵיטִים אֶֽל הַגּוֹיִ֞ם תַּרְשִׁ֨ישׁ פּ֥וּל וְל֛וּד מֹ֥שְׁכֵי קֶ֖שֶׁת תֻּבַ֣ל וְיָוָ֑ן הָאִיִּ֣ים הָרְחֹקִ֗ים אֲשֶׁ֨ר לֹא שָׁמְע֤וּ אֶת שִׁמְעִי֙ וְלֹא רָא֣וּ אֶת כְּבוֹדִ֔י וְהִגִּ֥ידוּ אֶת כְּבוֹדִ֖י בַּגּוֹיִֽם 1Qisaaושמתי בהמה אותות ושלחתי מהמה פליטים אל הגואים תרשיש פול ולוד משוך [קשת] תובל ויואן האים הרחוקים אשר לוא שמעו את שמעי ולוא ראוו [את] כבודי והגידו את כבודי בגואים 1Q8אות ושלחתי מהם [פליטים] [תרשיש] פול ולוד [משכי] קשת תבל הרחקים [אשר] לא [שמעו] [ראו] את [כבודי] הגידו את [גוים]
20МТוְהֵבִ֣יאוּ אֶת כָּל אֲחֵיכֶ֣ם מִכָּל הַגּוֹיִ֣ם מִנְחָ֣ה לַֽיהוָ֡ה בַּסּוּסִ֡ים וּ֠בָרֶכֶב וּבַצַּבִּ֨ים וּבַפְּרָדִ֜ים וּבַכִּרְכָּר֗וֹת עַ֣ל הַ֥ר קָדְשִׁ֛י יְרוּשָׁלִַ֖ם אָמַ֣ר יְהוָ֑ה כַּאֲשֶׁ֣ר יָבִיאוּ֩ בְנֵ֨י יִשְׂרָאֵ֧ל אֶת הַמִּנְחָ֛ה בִּכְלִ֥י טָה֖וֹר בֵּ֥ית יְהוָֽה 1Qisaaוהביאו את כול כול אחיכמה מכל הגואים מנחה ליהוה בסוסים וברכבם ובצובים ובובפרדים ובכורכובות אל הר קדשי ירושלים אמר יהוה כאשר יביאו בני ישראל את המנחה בכלי טהור בית יהוה 1Q8והביאו את [כל] [אחיכם] מכל [יהוה] בסוסים [צבים] כרכרות על הר [קדשי] [ירושלם] [יהוה] [כאשר] [בני] [ישראל] [את] [המנחה] [טהור] [בית] 4Q57[על] הר [קדשי] [ישראל] את ה
21МТוְגַם מֵהֶ֥ם אֶקַּ֛ח לַכֹּהֲנִ֥ים לַלְוִיִּ֖ם אָמַ֥ר יְהוָֽה 1Qisaaוגמ מהמה אקח ליא לכוהנים ללויים אמר יהוה 1Q8[גם] מהם אקח [כהנים] ללוים [אמר]
22МТכִּ֣י כַאֲשֶׁ֣ר הַשָּׁמַ֣יִם הַ֠חֳדָשִׁים וְהָאָ֨רֶץ הַחֲדָשָׁ֜ה אֲשֶׁ֨ר אֲנִ֥י עֹשֶׂ֛ה עֹמְדִ֥ים לְפָנַ֖י נְאֻם יְהוָ֑ה כֵּ֛ן יַעֲמֹ֥ד זַרְעֲכֶ֖ם וְשִׁמְכֶֽם 1Qisaaכיא כאשר השמים חדשים והארץ החדשה אשר אני עושה עומדים לפני נואמ יהוה כן יעמוד זרעכמה ושמכמה 4Q57ארץ [החדשה] [יעמד] זרעכם
23МТוְהָיָ֗ה מִֽדֵּי חֹ֙דֶשׁ֙ בְּחָדְשׁ֔וֹ וּמִדֵּ֥י שַׁבָּ֖ת בְּשַׁבַּתּ֑וֹ יָב֧וֹא כָל בָּשָׂ֛ר לְהִשְׁתַּחֲוֹ֥ת לְפָנַ֖י אָמַ֥ר יְהוָֽה 1Qisaaוהיה מדי חודש בחודשו ומדי שבת בשבתה יבוא כול הבשר להשתחות לפני אמר יהוה 1Q8די [חדש] [חדשו] ומדי [שבת] בשבתו יבוא [כל]
24МТוְיָצְא֣וּ וְרָא֔וּ בְּפִגְרֵי֙ הָאֲנָשִׁ֔ים הַפֹּשְׁעִ֖ים בִּ֑י כִּ֣י תוֹלַעְתָּ֞ם לֹ֣א תָמ֗וּת וְאִשָּׁם֙ לֹ֣א תִכְבֶּ֔ה וְהָי֥וּ דֵרָא֖וֹן לְכָל בָּשָֽׂר 1Qisaaויצאו וראו בפגרי האנשים הפושעים ביא כיא תולעתם לוא תמות [ואשהמה] לוא תכבה והיו דראון לכול הבשר