Исаии, глава 26
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТבַּיּ֣וֹם הַה֔וּא יוּשַׁ֥ר הַשִּׁיר הַזֶּ֖ה בְּאֶ֣רֶץ יְהוּדָ֑ה עִ֣יר עָז לָ֔נוּ יְשׁוּעָ֥ה יָשִׁ֖ית חוֹמ֥וֹת וָחֵֽל 1Qisaaביום ההוא ישיר השיר הזואת בארץ יהודה עיר עוז לנו ישועה ישית חומות וחל 1Q8[יושר] השירה הזאת [בארץ] 4Q57ביום ההוא יושר השיר ה בארץ יהודה [ישועה] ישית חומותיה וחילה
2МТפִּתְח֖וּ שְׁעָרִ֑ים וְיָבֹ֥א גוֹי צַדִּ֖יק שֹׁמֵ֥ר אֱמֻנִֽים 1Qisaaפתחו שעריך ויבוא גוי צדיק שומר אמונים 4Q57[יבוא] [גוי] צדיק שומר אמונים
3МТיֵ֣צֶר סָמ֔וּךְ תִּצֹּ֖ר שָׁל֣וֹם שָׁל֑וֹם כִּ֥י בְךָ֖ בָּטֽוּחַ 1Qisaaיצר סמוך תצר שלום שלום כי בכה 4Q57יצר [סמוך] בכה [בטוח]
4МТבִּטְח֥וּ בַֽיהוָ֖ה עֲדֵי עַ֑ד כִּ֚י בְּיָ֣הּ יְהוָ֔ה צ֖וּר עוֹלָמִֽים 4Q56כי ביה [אדני] [עולמים] 4Q57בטחו ביהוה עו עד [כיא] [עולם]
5МТכִּ֤י הֵשַׁח֙ יֹשְׁבֵ֣י מָר֔וֹם קִרְיָ֖ה נִשְׂגָּבָ֑ה יַשְׁפִּילֶ֤נָּה יַשְׁפִּילָהּ֙ עַד אֶ֔רֶץ יַגִּיעֶ֖נָּה עַד עָפָֽר 1Qisaaכי השת יושבי מרום קריה נשגבה ישפילנה עדי ארץ יגיענה עדי עפר 4Q57כיא השח יושבי מרום [קריה] [יגיענה] עד עפר
6МТתִּרְמְסֶ֖נָּה רָ֑גֶל רַגְלֵ֥י עָנִ֖י פַּעֲמֵ֥י דַלִּֽים 1Qisaaתרמסנה רגלי עניים פעמי דלים
7МТאֹ֥רַח לַצַּדִּ֖יק מֵֽישָׁרִ֑ים יָשָׁ֕ר מַעְגַּ֥ל צַדִּ֖יק תְּפַלֵּֽס 1Qisaaאורח לצדיק מישרים ישר מעגל צדק תפלט 4Q57לצדיק [מישירים] [ישרו] מעגל צדק
8МТאַ֣ף אֹ֧רַח מִשְׁפָּטֶ֛יךָ יְהוָ֖ה קִוִּינ֑וּךָ לְשִׁמְךָ֥ וּֽלְזִכְרְךָ֖ תַּאֲוַת נָֽפֶשׁ 1Qisaaאפ אורח משפטיך יהוה קוינו לשמך ולתורתך תאית נפש 4Q57יהוה [קוינוכה] [ולזכרכה] [תאות] [נפש]
9МТנַפְשִׁ֤י אִוִּיתִ֙יךָ֙ בַּלַּ֔יְלָה אַף רוּחִ֥י בְקִרְבִּ֖י אֲשַֽׁחֲרֶ֑ךָּ כִּ֞י כַּאֲשֶׁ֤ר מִשְׁפָּטֶ֙יךָ֙ לָאָ֔רֶץ צֶ֥דֶק לָמְד֖וּ יֹשְׁבֵ֥י תֵבֵֽל 1Qisaaנפשי אויתיך בלילה אפ רוחי בקרבי אשחרכה כי כאשר משפטיך לארץ צדק למדו יושבי תבל 4Q56[ארץ] צדק למדו [ישבי] 4Q57[רוחי] [בקרבי] [אשחרכה] [כיא]
10МТיֻחַ֤ן רָשָׁע֙ בַּל לָמַ֣ד צֶ֔דֶק בְּאֶ֥רֶץ נְכֹח֖וֹת יְעַוֵּ֑ל וּבַל יִרְאֶ֖ה גֵּא֥וּת יְהוָֽה 1Qisaaיחון רשע בל למד צדק בארץ נכוחות יעיל ובל יראה גאות יהוה
11МТיְהוָ֛ה רָ֥מָה יָדְךָ֖ בַּל יֶחֱזָי֑וּן יֶחֱז֤וּ וְיֵבֹ֙שׁוּ֙ קִנְאַת עָ֔ם אַף אֵ֖שׁ צָרֶ֥יךָ תֹאכְלֵֽם 1Qisaaיהוה רמה ידכה בל יחזיון ויחזו ויבושו קנאת העם אף אש צריך תאכלם 4Q56יהוה רומה ידך [בל] [אף] אש צריך [תאכלם]
12МТיְהוָ֕ה תִּשְׁפֹּ֥ת שָׁל֖וֹם לָ֑נוּ כִּ֛י גַּ֥ם כָּֽל מַעֲשֵׂ֖ינוּ פָּעַ֥לְתָּ לָּֽנוּ 1Qisaaיהוה תשפוט שלום לנו כי גמ כול מעשינו פעלתה לנו 4Q56תשפט שלום לנו כי [גם]
13МТיְהוָ֣ה אֱלֹהֵ֔ינוּ בְּעָל֥וּנוּ אֲדֹנִ֖ים זֽוּלָתֶ֑ךָ לְבַד בְּךָ֖ נַזְכִּ֥יר שְׁמֶֽךָ 1Qisaaיהוה אלוהינו בעלונו אדונים זולתך לבד בך נזכור שמך 4Q56אלהינו בעלנו [אדנים] [בד] בך נזכיר שמך
14МТמֵתִים֙ בַּל יִחְי֔וּ רְפָאִ֖ים בַּל יָקֻ֑מוּ לָכֵ֤ן פָּקַ֙דְתָּ֙ וַתַּשְׁמִידֵ֔ם וַתְּאַבֵּ֥ד כָּל זֵ֖כֶר לָֽמוֹ 1Qisaaמיתים בל יחיו ורפאים בל יקומו לכן פקדת ותשמידם ותאסר כול זכר למו 4Q56כן פקדת ותשמידם ו למו
15МТיָסַ֤פְתָּ לַגּוֹי֙ יְהוָ֔ה יָסַ֥פְתָּ לַגּ֖וֹי נִכְבָּ֑דְתָּ רִחַ֖קְתָּ כָּל קַצְוֵי אָֽרֶץ 1Qisaaיספת לגוי יהוה יספתה לגוי נכבדת רחקת כול קצוי ארץ
16МТיְהוָ֖ה בַּצַּ֣ר פְּקָד֑וּךָ צָק֣וּן לַ֔חַשׁ מוּסָרְךָ֖ לָֽמוֹ 1Qisaaיהוה בצר פקדוך צקון לחשו מוסריך למו
17МТכְּמ֤וֹ הָרָה֙ תַּקְרִ֣יב לָלֶ֔דֶת תָּחִ֥יל תִּזְעַ֖ק בַּחֲבָלֶ֑יהָ כֵּ֛ן הָיִ֥ינוּ מִפָּנֶ֖יךָ יְהוָֽה
18МТהָרִ֣ינוּ חַ֔לְנוּ כְּמ֖וֹ יָלַ֣דְנוּ ר֑וּחַ יְשׁוּעֹת֙ בַּל נַ֣עֲשֶׂה אֶ֔רֶץ וּבַֽל יִפְּל֖וּ יֹשְׁבֵ֥י תֵבֵֽל 1Qisaaהרינו חלנו כמו ילדנו רוח ישועתך בל נעשה ארץ ובל יפולו יושבי תבל
19МТיִֽחְי֣וּ מֵתֶ֔יךָ נְבֵלָתִ֖י יְקוּמ֑וּן הָקִ֨יצוּ וְרַנְּנ֜וּ שֹׁכְנֵ֣י עָפָ֗ר כִּ֣י טַ֤ל אוֹרֹת֙ טַלֶּ֔ךָ וָאָ֖רֶץ רְפָאִ֥ים תַּפִּֽיל 1Qisaaיחיו מיתיך נבלתי יקומון יקיצו וירננו שוכני עפר כי טל אורות טלך וארץ רפאים תפיל
20МТלֵ֤ךְ עַמִּי֙ בֹּ֣א בַחֲדָרֶ֔יךָ וּֽסְגֹ֥ר דְּלָתְךָ֖ בַּעֲדֶ֑ךָ חֲבִ֥י כִמְעַט רֶ֖גַע עַד יַעֲבָר זָֽעַם 1Qisaaלך עמי בא בחדריך וסגר דלתיך בעדך חבו כמעט רגע עד יעבור זעם 4Q56עמי [בא] בחדריך וסגר [דלתיך]
21МТכִּֽי הִנֵּ֤ה יְהוָה֙ יֹצֵ֣א מִמְּקוֹמ֔וֹ לִפְקֹ֛ד עֲוֹ֥ן יֹֽשֵׁב הָאָ֖רֶץ עָלָ֑יו וְגִלְּתָ֤ה הָאָ֙רֶץ֙ אֶת דָּמֶ֔יהָ וְלֹֽא תְכַסֶּ֥ה ע֖וֹד עַל הֲרוּגֶֽיהָ 1Qisaaכי יהוה יצא ממקומו לפקוד עוון יושב הארץ עליו וגלתה הארץ את דמיה ולוא תכסה עוד על הרוגיה