Исаии, глава 31
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТה֣וֹי הַיֹּרְדִ֤ים מִצְרַ֙יִם֙ לְעֶזְרָ֔ה עַל סוּסִ֖ים יִשָּׁעֵ֑נוּ וַיִּבְטְח֨וּ עַל רֶ֜כֶב כִּ֣י רָ֗ב וְעַ֤ל פָּֽרָשִׁים֙ כִּֽי עָצְמ֣וּ מְאֹ֔ד וְלֹ֤א שָׁעוּ֙ עַל קְד֣וֹשׁ יִשְׂרָאֵ֔ל וְאֶת יְהוָ֖ה לֹ֥א דָרָֽשׁוּ 1Qisaaהוי היורדים למצרים לעזרה על סוסים ישענו ויבטחו על הרכב כי רב ועל פרשים כי עצמו מאדה ולוא שעו אל קדוש ישראל ואת יהוה לוא דרשו
2МТוְגַם ה֤וּא חָכָם֙ וַיָּ֣בֵא רָ֔ע וְאֶת דְּבָרָ֖יו לֹ֣א הֵסִ֑יר וְקָם֙ עַל בֵּ֣ית מְרֵעִ֔ים וְעַל עֶזְרַ֖ת פֹּ֥עֲלֵי אָֽוֶן 1Qisaaוגמ הוא חכם ויביא רע ואת דבריו לוא הסיר וקם על בית מרעים ועל עזרת פועלי און
3МТוּמִצְרַ֤יִם אָדָם֙ וְֽלֹא אֵ֔ל וְסוּסֵיהֶ֥ם בָּשָׂ֖ר וְלֹא ר֑וּחַ וַֽיהוָ֞ה יַטֶּ֣ה יָד֗וֹ וְכָשַׁ֤ל עוֹזֵר֙ וְנָפַ֣ל עָזֻ֔ר וְיַחְדָּ֖ו כֻּלָּ֥ם יִכְלָיֽוּן 1Qisaaומצרים אדם ולוא אל וסוסיהמה בשר ולוא אריה ויהוה יטה ידו וכשל עוזר ונפל עזר יחדו כולם יכליון
4МТכִּ֣י כֹ֣ה אָֽמַר יְהוָ֣ה אֵלַ֡י כַּאֲשֶׁ֣ר יֶהְגֶּה֩ הָאַרְיֵ֨ה וְהַכְּפִ֜יר עַל טַרְפּ֗וֹ אֲשֶׁ֨ר יִקָּרֵ֤א עָלָיו֙ מְלֹ֣א רֹעִ֔ים מִקּוֹלָם֙ לֹ֣א יֵחָ֔ת וּמֵֽהֲמוֹנָ֖ם לֹ֣א יַֽעֲנֶ֑ה כֵּ֗ן יֵרֵד֙ יְהוָ֣ה צְבָא֔וֹת לִצְבֹּ֥א עַל הַר צִיּ֖וֹן וְעַל גִּבְעָתָֽהּ 1Qisaaכי כה אמר יהוה אלי כאשר יהגה האריה והכפיר על טרפיו אשר יקרא אליו מלאו רועים מקולם לוא יחת ומהמונם לוא יחת יענה כן ירד יהוה צבאות לצבא על הר ציון ועל גבעתה
5МТכְּצִפֳּרִ֣ים עָפ֔וֹת כֵּ֗ן יָגֵ֛ן יְהוָ֥ה צְבָא֖וֹת עַל יְרֽוּשָׁלִָ֑ם גָּנ֥וֹן וְהִצִּ֖יל פָּסֹ֥חַ וְהִמְלִֽיט 1Qisaaכצפורים עפות כן יגן יהוה צבאות על ירושלם גנון והציל ופסח והפליט
6МТשׁ֗וּבוּ לַאֲשֶׁ֛ר הֶעְמִ֥יקוּ סָרָ֖ה בְּנֵ֥י יִשְׂרָאֵֽל 1Qisaaשוביו לאשר לאשר העמיקו סרה בני ישראל
7МТכִּ֚י בַּיּ֣וֹם הַה֔וּא יִמְאָס֗וּן אִ֚ישׁ אֱלִילֵ֣י כַסְפּ֔וֹ וֶאֱלִילֵ֖י זְהָב֑וֹ אֲשֶׁ֨ר עָשׂ֥וּ לָכֶ֛ם יְדֵיכֶ֖ם חֵֽטְא 1Qisaaכי ביום ההוא ימאסון איש אלילי כספו ואלילי זהבו אשר עשו לכמ ידיכם חטאה
8МТוְנָפַ֤ל אַשּׁוּר֙ בְּחֶ֣רֶב לֹא אִ֔ישׁ וְחֶ֥רֶב לֹֽא אָדָ֖ם תֹּֽאכֲלֶ֑נּוּ וְנָ֥ס לוֹ֙ מִפְּנֵי חֶ֔רֶב וּבַחוּרָ֖יו לָמַ֥ס יִהְיֽוּ 1Qisaaונפל אשור בחרב לוא איש וחרב לואאדמ תאכולנו ונס ולוא מפני חרב ובחוריו למס יהיו
9МТוְסַלְעוֹ֙ מִמָּג֣וֹר יַֽעֲב֔וֹר וְחַתּ֥וּ מִנֵּ֖ס שָׂרָ֑יו נְאֻם יְהוָ֗ה אֲשֶׁר א֥וּר לוֹ֙ בְּצִיּ֔וֹן וְתַנּ֥וּר ל֖וֹ בִּירוּשָׁלִָֽם 1Qisaaוסלעו ממגור יעבור וחתו מנוס שריו נואם יהוה אשר אור לו בציון ותנור לו בירושלם