Исаии, глава 63
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТמִי זֶ֣ה בָּ֣א מֵאֱד֗וֹם חֲמ֤וּץ בְּגָדִים֙ מִבָּצְרָ֔ה זֶ֚ה הָד֣וּר בִּלְבוּשׁ֔וֹ צֹעֶ֖ה בְּרֹ֣ב כֹּח֑וֹ אֲנִ֛י מְדַבֵּ֥ר בִּצְדָקָ֖ה רַ֥ב לְהוֹשִֽׁיעַ 1Qisaaמיא זה בא מאדום חמוץ בגדים מבוצרה זה הדר בלבושו צועה ברוב כוחוה אני מדבר בעדקה רב להושיע 1Q8אדום חמוץ בגדים מבצרה זה הדור בלבושו [צעה] ברב כחו [אני] מדבר בצדק
2МТמַדּ֥וּעַ אָדֹ֖ם לִלְבוּשֶׁ֑ךָ וּבְגָדֶ֖יךָ כְּדֹרֵ֥ךְ בְּגַֽת 1Qisaaמדוע אדום ללבושכה ובגדיך כדורך בגד 1Q8מדוע אדם ללבושך בגדיך כדורך בגת
3МТפּוּרָ֣ה דָּרַ֣כְתִּי לְבַדִּ֗י וּמֵֽעַמִּים֙ אֵֽין אִ֣ישׁ אִתִּ֔י וְאֶדְרְכֵ֣ם בְּאַפִּ֔י וְאֶרְמְסֵ֖ם בַּחֲמָתִ֑י וְיֵ֤ז נִצְחָם֙ עַל בְּגָדַ֔י וְכָל מַלְבּוּשַׁ֖י אֶגְאָֽלְתִּי 1Qisaaפורה דרכתי לבדי ומעמי אין איש אתי וכול מלבושי גאלתי 1Q8[פורה] דרכתי לבדי מעמים אין [אתי] ואדרכם באפי וארמסם בחמתי ויז נצחם על בגדי וכל [מלבושי] גאלתי
4МТכִּ֛י י֥וֹם נָקָ֖ם בְּלִבִּ֑י וּשְׁנַ֥ת גְּאוּלַ֖י בָּֽאָה 1Qisaaכיא יומ נקם בלבי ושנת גאולי באה
5МТוְאַבִּיט֙ וְאֵ֣ין עֹזֵ֔ר וְאֶשְׁתּוֹמֵ֖ם וְאֵ֣ין סוֹמֵ֑ךְ וַתּ֤וֹשַֽׁע לִי֙ זְרֹעִ֔י וַחֲמָתִ֖י הִ֥יא סְמָכָֽתְנִי 1Qisaaואביט ואין עוזר ואשתוממ ואין תומך ותושע ליא זרועי וחמתיא היא סמכתני 1Q8ואביטה ואין איש ואשתוממה ואין [סומך] ותושע לי זרעי [היא] סמכתני
6МТוְאָב֤וּס עַמִּים֙ בְּאַפִּ֔י וַאֲשַׁכְּרֵ֖ם בַּחֲמָתִ֑י וְאוֹרִ֥יד לָאָ֖רֶץ נִצְחָֽם 1Qisaaואבוסה עמים באפיא ואשכירםה בחמתי ואורידה לארצ נצחם 1Q8ואבוסה עמים באפי ואשכירם בחמתי וארידה [לארץ]
7МТחַֽסְדֵ֨י יְהוָ֤ה אַזְכִּיר֙ תְּהִלֹּ֣ת יְהוָ֔ה כְּעַ֕ל כֹּ֥ל אֲשֶׁר גְּמָלָ֖נוּ יְהוָ֑ה וְרַב טוּב֙ לְבֵ֣ית יִשְׂרָאֵ֔ל אֲשֶׁר גְּמָלָ֥ם כְּֽרַחֲמָ֖יו וּכְרֹ֥ב חֲסָדָֽיו 1Qisaaחסדי יהוה אזכיר תהלת יהוה כעל כול אשר גמלנו יהוה ורב טוב לבית ישראל אשר גמאלם כרחמיו וכרוב חסדיו 1Q8חסדי תהלות יהוה כעל כל אשר גמלנו יהוה ורב טוב לבית [ישראל] [גמלם] [כרחמיו]
8МТוַיֹּ֙אמֶר֙ אַךְ עַמִּ֣י הֵ֔מָּה בָּנִ֖ים לֹ֣א יְשַׁקֵּ֑רוּ וַיְהִ֥י לָהֶ֖ם לְמוֹשִֽׁיעַ 1Qisaaויואמר אכ עמי המה בנים לוא ישקרו ויהי להמה למושיע 1Q8[יאמר] עמי המה ישקרו ויהי להם למושיע
9МТבְּֽכָל צָרָתָ֣ם ל֣וֹ צָ֗ר וּמַלְאַ֤ךְ פָּנָיו֙ הֽוֹשִׁיעָ֔ם בְּאַהֲבָת֥וֹ וּבְחֶמְלָת֖וֹ ה֣וּא גְאָלָ֑ם וַֽיְנַטְּלֵ֥ם וַֽיְנַשְּׂאֵ֖ם כָּל יְמֵ֥י עוֹלָֽם 1Qisaaבכול צרתמה לוא צר ומלאכ פניו הושיעמה באהבתיו ובחומלתיו הואה גאלמה וינשאם וינטלמ כול ימי עולם 1Q8ב [גאלם] [ינטלם] [ינשאם] כל [ימי]
10МТוְהֵ֛מָּה מָר֥וּ וְעִצְּב֖וּ אֶת ר֣וּחַ קָדְשׁ֑וֹ וַיֵּהָפֵ֥ךְ לָהֶ֛ם לְאוֹיֵ֖ב ה֥וּא נִלְחַם בָּֽם 1Qisaaוהמה מרו ועצבו את רוח קודשיו ויהפך להמה לאויב והואה נלחם במ
11МТוַיִּזְכֹּ֥ר יְמֵֽי עוֹלָ֖ם מֹשֶׁ֣ה עַמּ֑וֹ אַיֵּ֣ה הַֽמַּעֲלֵ֣ם מִיָּ֗ם אֵ֚ת רֹעֵ֣י צֹאנ֔וֹ אַיֵּ֛ה הַשָּׂ֥ם בְּקִרְבּ֖וֹ אֶת ר֥וּחַ קָדְשֽׁוֹ 1Qisaaויזכור ימי עולם מושה עמוא איה המעלה מים את רועי צואונו איה השמ בקרבו את רוח קודשו
12МТמוֹלִיךְ֙ לִימִ֣ין מֹשֶׁ֔ה זְר֖וֹעַ תִּפְאַרְתּ֑וֹ בּ֤וֹקֵֽעַ מַ֙יִם֙ מִפְּנֵיהֶ֔ם לַעֲשׂ֥וֹת ל֖וֹ שֵׁ֥ם עוֹלָֽם 1Qisaaומוליך לימין מושה זרוע תפארתיו בוקע מים מפניהמה לעשות שמ עולם
13МТמוֹלִיכָ֖ם בַּתְּהֹמ֑וֹת כַּסּ֥וּס בַּמִּדְבָּ֖ר לֹ֥א יִכָּשֵֽׁלוּ 1Qisaaמוליכם בתומות כסוס במדיבר לוא יכשלו
14МТכַּבְּהֵמָה֙ בַּבִּקְעָ֣ה תֵרֵ֔ד ר֥וּחַ יְהוָ֖ה תְּנִיחֶ֑נּוּ כֵּ֚ן נִהַ֣גְתָּ עַמְּךָ֔ לַעֲשׂ֥וֹת לְךָ֖ שֵׁ֥ם תִּפְאָֽרֶת 1Qisaaכבהמה בבקעה תרד רוח יהוה תניחנו כיא נהגתה עמכה לעשות לכה שמ תפארת
15МТהַבֵּ֤ט מִשָּׁמַ֙יִם֙ וּרְאֵ֔ה מִזְּבֻ֥ל קָדְשְׁךָ֖ וְתִפְאַרְתֶּ֑ךָ אַיֵּ֤ה קִנְאָֽתְךָ֙ וּגְב֣וּרֹתֶ֔ךָ הֲמ֥וֹן מֵעֶ֛יךָ וְֽרַחֲמֶ֖יךָ אֵלַ֥י הִתְאַפָּֽקוּ 1Qisaaהבט מן השמים וראה מזבול קודשכה ותפארתכה איה קנאתכה וגבורתכה המון מעיך ורחמיכ אלי התאפקו
16МТכִּֽי אַתָּ֣ה אָבִ֔ינוּ כִּ֤י אַבְרָהָם֙ לֹ֣א יְדָעָ֔נוּ וְיִשְׂרָאֵ֖ל לֹ֣א יַכִּירָ֑נוּ אַתָּ֤ה יְהוָה֙ אָבִ֔ינוּ גֹּאֲלֵ֥נוּ מֵֽעוֹלָ֖ם שְׁמֶֽךָ 1Qisaaכיא אתה אבינו ואברהם לוא ידענו וישראל לוא הכירנו אתה הואה יהוה אבינו גואלנו מעולם שמכה
17МТלָ֣מָּה תַתְעֵ֤נוּ יְהוָה֙ מִדְּרָכֶ֔יךָ תַּקְשִׁ֥יחַ לִבֵּ֖נוּ מִיִּרְאָתֶ֑ךָ שׁ֚וּב לְמַ֣עַן עֲבָדֶ֔יךָ שִׁבְטֵ֖י נַחֲלָתֶֽךָ 1Qisaaלמה יהוה תתענו מדרכיכה תקשיח לבנו מיראתך שוב למען עבדיך שבט נחלתך
18МТלַמִּצְעָ֕ר יָרְשׁ֖וּ עַם קָדְשֶׁ֑ךָ צָרֵ֕ינוּ בּוֹסְס֖וּ מִקְדָּשֶֽׁךָ 1Qisaaלמצער ירש עמ קודשך צרינו בססו מקדשכה
19МТהָיִ֗ינוּ מֵֽעוֹלָם֙ לֹֽא מָשַׁ֣לְתָּ בָּ֔ם לֹֽא נִקְרָ֥א שִׁמְךָ֖ עֲלֵיהֶ֑ם 1Qisaaהוינו מעולם לוא משלתה בם לוא נקרא שמכה עליהמה לוא קרעתה שמים וירדתה מפניכה הרים נזלו 1Q8[היינו] מעולם לא [משלת] לא נקרא [קרעת] שמים [ירדת] [פניך] [הרים] [נזלו]