Исаии, глава 48
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТשִׁמְעוּ זֹ֣את בֵּֽית יַעֲקֹ֗ב הַנִּקְרָאִים֙ בְּשֵׁ֣ם יִשְׂרָאֵ֔ל וּמִמֵּ֥י יְהוּדָ֖ה יָצָ֑אוּ הַֽנִּשְׁבָּעִ֣ים בְּשֵׁ֣ם יְהוָ֗ה וּבֵאלֹהֵ֤י יִשְׂרָאֵל֙ יַזְכִּ֔ירוּ לֹ֥א בֶאֱמֶ֖ת וְלֹ֥א בִצְדָקָֽה 1Qisaaשמעו זואת בית יעקוב הנקראים בשמ ישראל וממי יהודה יצאו הנשבעים בשם יהוה ובאלוהי ישראל יזכירו לוא באמת ולוא בצדקה
2МТכִּֽי מֵעִ֤יר הַקֹּ֙דֶשׁ֙ נִקְרָ֔אוּ וְעַל אֱלֹהֵ֥י יִשְׂרָאֵ֖ל נִסְמָ֑כוּ יְהוָ֥ה צְבָא֖וֹת שְׁמֽוֹ 1Qisaaכיא מעיר הקודש נקראו ועל אלוהי ישראל נסמכו יהוה צבאות שמו
3МТהָרִֽאשֹׁנוֹת֙ מֵאָ֣ז הִגַּ֔דְתִּי וּמִפִּ֥י יָצְא֖וּ וְאַשְׁמִיעֵ֑ם פִּתְאֹ֥ם עָשִׂ֖יתִי וַתָּבֹֽאנָה 1Qisaaהרישונות מאז הגדתי ומפי יצאה ואשמיעם פתאום עשיתי ותבואינה
4МТמִדַּעְתִּ֕י כִּ֥י קָשֶׁ֖ה אָ֑תָּה וְגִ֤יד בַּרְזֶל֙ עָרְפֶּ֔ךָ וּמִצְחֲךָ֖ נְחוּשָֽׁה 1Qisaaמאשר ידעתי כיא קשה אתה וגיד ברזל עורפךה ומצחכה נחושה
5МТוָאַגִּ֤יד לְךָ֙ מֵאָ֔ז בְּטֶ֥רֶם תָּב֖וֹא הִשְׁמַעְתִּ֑יךָ פֶּן תֹּאמַר֙ עָצְבִּ֣י עָשָׂ֔ם וּפִסְלִ֥י וְנִסְכִּ֖י צִוָּֽם 1Qisaaואגידה לכה מאז בטרם תבוא השמעתיכה פן תואמר עצבי עשם פסלי ונסכי צום
6МТשָׁמַ֤עְתָּֽ חֲזֵה֙ כֻּלָּ֔הּ וְאַתֶּ֖ם הֲל֣וֹא תַגִּ֑ידוּ הִשְׁמַעְתִּ֤יךָ חֲדָשׁוֹת֙ מֵעַ֔תָּה וּנְצֻר֖וֹת וְלֹ֥א יְדַעְתָּֽם 1Qisaaשמעתה חזה כולה ואתמה הלוא תגידו השמעתיכה חדשות מעתה ונצורות לוא ידעתן
7МТעַתָּ֤ה נִבְרְאוּ֙ וְלֹ֣א מֵאָ֔ז וְלִפְנֵי י֖וֹם וְלֹ֣א שְׁמַעְתָּ֑ם פֶּן תֹּאמַ֖ר הִנֵּ֥ה יְדַעְתִּֽין 1Qisaaעתה נבראו ולוא מאז ולפני יום לוא שמעתים פן תואמר הנה ידעתים
8МТגַּ֣ם לֹֽא שָׁמַ֗עְתָּ גַּ֚ם לֹ֣א יָדַ֔עְתָּ גַּ֕ם מֵאָ֖ז לֹא פִתְּחָ֣ה אָזְנֶ֑ךָ כִּ֤י יָדַ֙עְתִּי֙ בָּג֣וֹד תִּבְגּ֔וֹד וּפֹשֵׁ֥עַ מִבֶּ֖טֶן קֹ֥רָא לָֽךְ 1Qisaaוגמ לוא שמעתי גמ לוא ידעתה גמ מאז לוא פתחת אוזנכה כיא ידעתי כיא בגוד תבגוד ופושע מבטן יקראו לכה
9МТלְמַ֤עַן שְׁמִי֙ אַאֲרִ֣יךְ אַפִּ֔י וּתְהִלָּתִ֖י אֶחֱטָם לָ֑ךְ לְבִלְתִּ֖י הַכְרִיתֶֽךָ 1Qisaaלמען שמי אאריך אפי ותהלתי אחטום לכה לבלתי הכריתכה
10МТהִנֵּ֥ה צְרַפְתִּ֖יךָ וְלֹ֣א בְכָ֑סֶף בְּחַרְתִּ֖יךָ בְּכ֥וּר עֹֽנִי 1Qisaaהנה צרפתיכה ולוא בכסף בחנתיכה בכור עני
11МТלְמַעֲנִ֧י לְמַעֲנִ֛י אֶעֱשֶׂ֖ה כִּ֣י אֵ֣יךְ יֵחָ֑ל וּכְבוֹדִ֖י לְאַחֵ֥ר לֹֽא אֶתֵּֽן 1Qisaaלמעני למעני אעשה כיא איכה איחל וכבודי לאחר לוא אתן 4Q58[למעני] למעני אעשה כי איך אאיחל וכבודי
12МТשְׁמַ֤ע אֵלַי֙ יַֽעֲקֹ֔ב וְיִשְׂרָאֵ֖ל מְקֹרָאִ֑י אֲנִי הוּא֙ אֲנִ֣י רִאשׁ֔וֹן אַ֖ף אֲנִ֥י אַחֲרֽוֹן 1Qisaaשמע אלה יעקוב וישראל מקראי אני הואה אני רישון אפ אני אחרון 4Q58שמע [מקראי] אני הוא אני ראשון גם [אני]
13МТאַף יָדִי֙ יָ֣סְדָה אֶ֔רֶץ וִֽימִינִ֖י טִפְּחָ֣ה שָׁמָ֑יִם קֹרֵ֥א אֲנִ֛י אֲלֵיהֶ֖ם יַעַמְד֥וּ יַחְדָּֽו 1Qisaaאפ ידי יסדו ארץ וימיני טפחה שמים קורה אני אליהמה ויעמודו יחדיו 4Q58אף ידי [יסדה] ארץ ימיני [טפחה] שמים קרא אני אליהם ויעמדו
14МТהִקָּבְצ֤וּ כֻלְּכֶם֙ וּֽשֲׁמָ֔עוּ מִ֥י בָהֶ֖ם הִגִּ֣יד אֶת אֵ֑לֶּה יְהוָ֣ה אֲהֵב֔וֹ יַעֲשֶׂ֤ה חֶפְצוֹ֙ בְּבָבֶ֔ל וּזְרֹע֖וֹ כַּשְׂדִּֽים 1Qisaaיקבצו כולם וישמעו מי בהם ויגיד את אלה יהוה אוהבי וישה חפצי בבבל זרועו כשדיים
15МТאֲנִ֥י אֲנִ֛י דִּבַּ֖רְתִּי אַף קְרָאתִ֑יו הֲבִיאֹתִ֖יו וְהִצְלִ֥יחַ דַּרְכּֽוֹ 1Qisaaאני אני דברתי אפ קראתי והביאותיהו והצליחה דרכוהי 4Q58אני דברתי אף [קראתיו] הבאתיו והצליח [דרכו]
16МТקִרְב֧וּ אֵלַ֣י שִׁמְעוּ זֹ֗את לֹ֤א מֵרֹאשׁ֙ בַּסֵּ֣תֶר דִּבַּ֔רְתִּי מֵעֵ֥ת הֱיוֹתָ֖הּ שָׁ֣ם אָ֑נִי וְעַתָּ֗ה אֲדֹנָ֧י יְהוִ֛ה שְׁלָחַ֖נִי וְרוּחֽוֹ 1Qisaaקרובו אלי ושמעו זואת לוא מרוש בסתר דברתי בעת היותה שמה אני ועתה אדוני יהוה שלחני ורוחו
17МТכֹּֽה אָמַ֧ר יְהוָ֛ה גֹּאַלְךָ֖ קְד֣וֹשׁ יִשְׂרָאֵ֑ל אֲנִ֨י יְהוָ֤ה אֱלֹהֶ֙יךָ֙ מְלַמֶּדְךָ֣ לְהוֹעִ֔יל מַדְרִֽיכֲךָ֖ בְּדֶ֥רֶךְ תֵּלֵֽךְ 1Qisaaכוה אמר יהוה גואלכה קדוש ישראל אני יהוה אלוהיכה מלמדכה להועיל הדריכה בדרך אשר תלך בה 1Q8כה אמר יהוה גאלך [אלהיך] [מלמדך] להועיל מדרכיך בדרך תלך
18МТל֥וּא הִקְשַׁ֖בְתָּ לְמִצְוֹתָ֑י וַיְהִ֤י כַנָּהָר֙ שְׁלוֹמֶ֔ךָ וְצִדְקָתְךָ֖ כְּגַלֵּ֥י הַיָּֽם 1Qisaaולוא הקשבתה אל מצוותי והיה כנהר שלומכה וצדקתך כגלי הים 1Q8ולא [הקשבת] [נהר] שלמך וצדקתך כגלי הים 4Q58[נהר] שלמך וצדקתך כגלי הים
19МТוַיְהִ֤י כַחוֹל֙ זַרְעֶ֔ךָ וְצֶאֱצָאֵ֥י מֵעֶ֖יךָ כִּמְעֹתָ֑יו לֹֽא יִכָּרֵ֧ת וְֽלֹא יִשָּׁמֵ֛ד שְׁמ֖וֹ מִלְּפָנָֽי 1Qisaaויהי כחול זרעכה וצאצאיכה כמעותיו לוא יכרת ולוא ישמד שמו מלפני 1Q8ויהי כחול זרעך ו [מעתיו] לא יכרת ולא ישמד שמו מלפני
20МТצְא֣וּ מִבָּבֶל֮ בִּרְח֣וּ מִכַּשְׂדִּים֒ בְּק֣וֹל רִנָּ֗ה הַגִּ֤ידוּ הַשְׁמִ֙יעוּ֙ זֹ֔את הוֹצִיא֖וּהָ עַד קְצֵ֣ה הָאָ֑רֶץ אִמְר֕וּ גָּאַ֥ל יְהוָ֖ה עַבְדּ֥וֹ יַעֲקֹֽב 1Qisaaצאו מבבל ברחו מכשדיים בקול רונה הגידו והשמיעו זואת עד קצוי הארץ אמרו גאל יהוה את עבדו יעקוב 1Q8ברחו מכשדים בקול רנה הגידו השמיעו זאת [הוצאוה] ארץ אמרו גאל יהוה עבדו יעקב 4Q58[השמיעו] זאת הוציאוה עד קצה ה
21МТוְלֹ֣א צָמְא֗וּ בָּחֳרָבוֹת֙ הֽוֹלִיכָ֔ם מַ֥יִם מִצּ֖וּר הִזִּ֣יל לָ֑מוֹ וַיִּ֨בְקַע צ֔וּר וַיָּזֻ֖בוּ מָֽיִם 1Qisaaולוא צמאו בחרבות הוליכו מים מצור הזיב למו ויבקע צור ויזובו מים 1Q8ולא צמאו [בחרבות] [מים] מצור הזיל למו ויבקע צר ויזבו מים 4Q58בחרבות הוליכם מים מצר הזיל
22МТאֵ֣ין שָׁל֔וֹם אָמַ֥ר יְהוָ֖ה לָרְשָׁעִֽים 1Qisaaואין שלום אמר יהוה לרשעים 1Q8אין שלום אמר [יהוה] [רשעים]