Исаии, глава 46
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТכָּרַ֥ע בֵּל֙ קֹרֵ֣ס נְב֔וֹ הָיוּ֙ עֲצַבֵּיהֶ֔ם לַחַיָּ֖ה וְלַבְּהֵמָ֑ה נְשֻׂאֹתֵיכֶ֣ם עֲמוּס֔וֹת מַשָּׂ֖א לַעֲיֵפָֽה 1Qisaaכרע בל קרס נבו היו עצביהמה לחיה לבהמה נשאותיכמה עמוסות משמועיהמה 4Q56[בהמה] [נשאתיכם] עמסות משא
2МТקָרְס֤וּ כָֽרְעוּ֙ יַחְדָּ֔ו לֹ֥א יָכְל֖וּ מַלֵּ֣ט מַשָּׂ֑א וְנַפְשָׁ֖ם בַּשְּׁבִ֥י הָלָֽכָה 1Qisaaקרסו כרעו יחדיו ולוא יוכלו מלט משא ונפשמה בשבי הלכו
3МТשִׁמְע֤וּ אֵלַי֙ בֵּ֣ית יַעֲקֹ֔ב וְכָל שְׁאֵרִ֖ית בֵּ֣ית יִשְׂרָאֵ֑ל הַֽעֲמֻסִים֙ מִנִּי בֶ֔טֶן הַנְּשֻׂאִ֖ים מִנִּי רָֽחַם 1Qisaaשמע אלי בית יעקוב וכול שארית בית ישראל עומסים ממני בטן ונושאים ממני רחם
4МТוְעַד זִקְנָה֙ אֲנִ֣י ה֔וּא וְעַד שֵיבָ֖ה אֲנִ֣י אֶסְבֹּ֑ל אֲנִ֤י עָשִׂ֙יתִי֙ וַאֲנִ֣י אֶשָּׂ֔א וַאֲנִ֥י אֶסְבֹּ֖ל וַאֲמַלֵּֽט 1Qisaaעד זקנה אני הואה ועד שיבה אני אסבול אני עשיתי ואני אשא ואנוכי אסבול ואמלטה 1Q8[שיבה] אני אסבול אני [עשיתי]
5МТלְמִ֥י תְדַמְי֖וּנִי וְתַשְׁו֑וּ וְתַמְשִׁל֖וּנִי וְנִדְמֶֽה 1Qisaaלמיי תדמיוני ותשוי ותמשלוני ואדמה 1Q8תדמיוני ותשוי [ותמשלוני] ונדמה
6МТהַזָּלִ֤ים זָהָב֙ מִכִּ֔יס וְכֶ֖סֶף בַּקָּנֶ֣ה יִשְׁקֹ֑לוּ יִשְׂכְּר֤וּ צוֹרֵף֙ וְיַעֲשֵׂ֣הוּ אֵ֔ל יִסְגְּד֖וּ אַף יִֽשְׁתַּחֲוּֽוּ 1Qisaaהזלים זהב בכיס וכסף בקנה ישקולו ישכורו צורף ויעשה אל ויסגודו אף ישתחו 1Q8הזלים בקנה ישקלו וישכרו צורף [יעשהו] אל [ויסגדו]
7МТיִ֠שָּׂאֻהוּ עַל כָּתֵ֨ף יִסְבְּלֻ֜הוּ וְיַנִּיחֻ֤הוּ תַחְתָּיו֙ וְיַֽעֲמֹ֔ד מִמְּקוֹמ֖וֹ לֹ֣א יָמִ֑ישׁ אַף יִצְעַ֤ק אֵלָיו֙ וְלֹ֣א יַעֲנֶ֔ה מִצָּרָת֖וֹ לֹ֥א יוֹשִׁיעֶֽנּוּ 1Qisaaוישאוהי על כתף יסבלוהי ויניחוהי תחתיו ויעמוד ממקומו לוא ימוש אפ יזעק עליו ולוא יענה מצרתו לוא יושיענו 1Q8[ישאהו] על כתף יסבלהו [וינחהו] [תחתיו] ויעמד ממקומו [יצעק] אליו ולא יענה [מצרתו] [לא] יושיענו
8МТזִכְרוּ זֹ֖את וְהִתְאֹשָׁ֑שׁוּ הָשִׁ֥יבוּ פוֹשְׁעִ֖ים עַל לֵֽב 1Qisaaזכורו זואת והתאוששו השיבו פושעים על לב 1Q8זכרו זאת השיבו פשעים על לב
9МТזִכְר֥וּ רִאשֹׁנ֖וֹת מֵעוֹלָ֑ם כִּ֣י אָנֹכִ֥י אֵל֙ וְאֵ֣ין ע֔וֹד אֱלֹהִ֖ים וְאֶ֥פֶס כָּמֽוֹנִי 1Qisaaזכורו רישונות מעולם כיא אני אל ואין עוד אלוהים ואפס כמוני
10МТמַגִּ֤יד מֵֽרֵאשִׁית֙ אַחֲרִ֔ית וּמִקֶּ֖דֶם אֲשֶׁ֣ר לֹא נַעֲשׂ֑וּ אֹמֵר֙ עֲצָתִ֣י תָק֔וּם וְכָל חֶפְצִ֖י אֶעֱשֶֽׂה 1Qisaaמגיד מראישית אחרות ומקדם אשר לוא נעשו אמר עצתי תקום וכול חפצי יעשה 1Q8מגיד ראשית אחרית ומקדם [נעשו] אמר עצתי תקום וכל חפצי אעשה 4Q57[אחרונות] ומקדם אשר [לוא] אעשה
11МТקֹרֵ֤א מִמִּזְרָח֙ עַ֔יִט מֵאֶ֥רֶץ מֶרְחָ֖ק אִ֣ישׁ עֲצָתִ֑י אַף דִּבַּ֙רְתִּי֙ אַף אֲבִיאֶ֔נָּה יָצַ֖רְתִּי אַף אֶעֱשֶֽׂנָּה 1Qisaaקורה ממזרח עיט מארץ מרחק איש עצתו אף דברתי אף אביאנה יצרתיה אף אעשנה 4Q57קורא ממזרח עיט מ [דברתי] אף אביאנה יצרתי אף אעשנה
12МТשִׁמְע֥וּ אֵלַ֖י אַבִּ֣ירֵי לֵ֑ב הָרְחוֹקִ֖ים מִצְּדָקָֽה 1Q8שמעו אלי אבירי לב הרחקים מצדקה 4Q58[אבירי] לב הרחקים [מצדקה]
13МТקֵרַ֤בְתִּי צִדְקָתִי֙ לֹ֣א תִרְחָ֔ק וּתְשׁוּעָתִ֖י לֹ֣א תְאַחֵ֑ר וְנָתַתִּ֤י בְצִיּוֹן֙ תְּשׁוּעָ֔ה לְיִשְׂרָאֵ֖ל תִּפְאַרְתִּֽי 1Qisaaקרובה צדקתי ולוא תרחק ותשועתי ולוא תאחר נתתי בציון תשועה ולישראל תפארתי 4Q57הקרבתי צדקתי ו [תאחר] ונתתי בציון תשועה [ולישראל] 4Q58ציון תשועה ל [תפארתי]