Исаии, глава 38
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТבַּיָּמִ֣ים הָהֵ֔ם חָלָ֥ה חִזְקִיָּ֖הוּ לָמ֑וּת וַיָּב֣וֹא אֵ֠לָיו יְשַׁעְיָ֨הוּ בֶן אָמ֜וֹץ הַנָּבִ֗יא וַיֹּ֨אמֶר אֵלָ֜יו כֹּֽה אָמַ֤ר יְהוָה֙ צַ֣ו לְבֵיתֶ֔ךָ כִּ֛י מֵ֥ת אַתָּ֖ה וְלֹ֥א תִֽחְיֶֽה 1Qisaaבימים ההמה חלה יחוזקיה למות ויבוא אליו ישעיה בן אמוץ הנביא ויואמר אליו כוה אמר יהוה צוי לביתכה כיא מית אתה ולוא תחיה
2МТוַיַּסֵּ֧ב חִזְקִיָּ֛הוּ פָּנָ֖יו אֶל הַקִּ֑יר וַיִּתְפַּלֵּ֖ל אֶל יְהוָֽה 1Qisaaויסוב יחוזקיה פניו אל הקיר ויתפלל אל יהוה
3МТוַיֹּאמַ֗ר אָנָּ֤ה יְהוָה֙ זְכָר נָ֞א אֵ֣ת אֲשֶׁ֧ר הִתְהַלַּ֣כְתִּי לְפָנֶ֗יךָ בֶּֽאֱמֶת֙ וּבְלֵ֣ב שָׁלֵ֔ם וְהַטּ֥וֹב בְּעֵינֶ֖יךָ עָשִׂ֑יתִי וַיֵּ֥בְךְּ חִזְקִיָּ֖הוּ בְּכִ֥י גָדֽוֹל 1Qisaaויואמר אנה יהוה זכורנא את אשר התהלכתי לפניכה באמת ובלבב שלם והטוב בעיניכה עשיתי ויבכא יחוזקיה בכי גדול
4МТוַֽיְהִי֙ דְּבַר יְהוָ֔ה אֶֽל יְשַׁעְיָ֖הוּ לֵאמֹֽר 1Qisaaויהי דבר יהוה אל ישעיה לאמור
5МТהָל֞וֹךְ וְאָמַרְתָּ֣ אֶל חִזְקִיָּ֗הוּ כֹּֽה אָמַ֤ר יְהוָה֙ אֱלֹהֵי֙ דָּוִ֣ד אָבִ֔יךָ שָׁמַ֙עְתִּי֙ אֶת תְּפִלָּתֶ֔ךָ רָאִ֖יתִי אֶת דִּמְעָתֶ֑ךָ הִנְנִי֙ יוֹסִ֣ף עַל יָמֶ֔יךָ חֲמֵ֥שׁ עֶשְׂרֵ֖ה שָׁנָֽה 1Qisaaהלוך ואמרתה אל יחוזקיה כוה אמר יהוה אלוהי דויד אביכה שמעתי את תפלתכה וראיתי את דמעתכה הנני יוסף על ימיךה חמש עשרה שנה
6МТוּמִכַּ֤ף מֶֽלֶךְ אַשּׁוּר֙ אַצִּ֣ילְךָ֔ וְאֵ֖ת הָעִ֣יר הַזֹּ֑את וְגַנּוֹתִ֖י עַל הָעִ֥יר הַזֹּֽאת 1Qisaaומכף מלך אשור אצילכה ואת העיר הזואת וגנותי על העיר הזואת למעני ולמען דויד עבדי
7МТוְזֶה לְּךָ֥ הָא֖וֹת מֵאֵ֣ת יְהוָ֑ה אֲשֶׁר֙ יַעֲשֶׂ֣ה יְהוָ֔ה אֶת הַדָּבָ֥ר הַזֶּ֖ה אֲשֶׁ֥ר דִּבֵּֽר 1Qisaaוזה לכה האות מאת יהוה אשר יעשה יהוה את הדבר הזה אשר דבר
8МТהִנְנִ֣י מֵשִׁ֣יב אֶת צֵ֣ל הַֽמַּעֲל֡וֹת אֲשֶׁ֣ר יָרְדָה֩ בְמַעֲל֨וֹת אָחָ֥ז בַּשֶּׁ֛מֶשׁ אֲחֹרַנִּ֖ית עֶ֣שֶׂר מַעֲל֑וֹת וַתָּ֤שָׁב הַשֶּׁ֙מֶשׁ֙ עֶ֣שֶׂר מַעֲל֔וֹת בַּֽמַּעֲל֖וֹת אֲשֶׁ֥ר יָרָֽדָה 1Qisaaהנני משיב את צל המעלות אשר ירדה במעלות עלית אחז את השמש אחורנית עשר מעלות ותשוב השמש עשר מעלות במעלות אשר ירדה
9МТמִכְתָּ֖ב לְחִזְקִיָּ֣הוּ מֶֽלֶךְ יְהוּדָ֑ה בַּחֲלֹת֕וֹ וַיְחִ֖י מֵחָלְיֽוֹ 1Qisaaמכתב ליחוזקיה מלכ יהודה בחוליותיו ויחי מחוליו
10МТאֲנִ֣י אָמַ֗רְתִּי בִּדְמִ֥י יָמַ֛י אֵלֵ֖כָה בְּשַׁעֲרֵ֣י שְׁא֑וֹל פֻּקַּ֖דְתִּי יֶ֥תֶר שְׁנוֹתָֽי 1Qisaaאני אמרתי בדמי וימי אלכה בשערי שאול פקודתי ומר שנותי
11МТאָמַ֙רְתִּי֙ לֹא אֶרְאֶ֣ה יָ֔הּ יָ֖הּ בְּאֶ֣רֶץ הַחַיִּ֑ים לֹא אַבִּ֥יט אָדָ֛ם ע֖וֹד עִם י֥וֹשְׁבֵי חָֽדֶל 1Qisaaאמרתי לוא אראה יה בארץ חיים ולוא אביט אדם עוד עמ יושבי חדל
12МТדּוֹרִ֗י נִסַּ֧ע וְנִגְלָ֛ה מִנִּ֖י כְּאֹ֣הֶל רֹעִ֑י קִפַּ֨דְתִּי כָאֹרֵ֤ג חַיַּי֙ מִדַּלָּ֣ה יְבַצְּעֵ֔נִי מִיּ֥וֹם עַד לַ֖יְלָה תַּשְׁלִימֵֽנִי 1Qisaaדורי נסע יכלה מני כאוהל רעי ספרתי כאורג חיי מדלה יבצעני מיום עד לילה תשלימני
13МТשִׁוִּ֤יתִי עַד בֹּ֙קֶר֙ כָּֽאֲרִ֔י כֵּ֥ן יְשַׁבֵּ֖ר כָּל עַצְמוֹתָ֑י מִיּ֥וֹם עַד לַ֖יְלָה תַּשְׁלִימֵֽנִי 1Qisaaשפותי עד בוקר כארי כן ישבור כול עצמותי מיום עד לילה תשלימני
14МТכְּס֤וּס עָגוּר֙ כֵּ֣ן אֲצַפְצֵ֔ף אֶהְגֶּ֖ה כַּיּוֹנָ֑ה דַּלּ֤וּ עֵינַי֙ לַמָּר֔וֹם אֲדֹנָ֖י עָֽשְׁקָה לִּ֥י עָרְבֵֽנִי 1Qisaaכסוס עוגר כן אצפצפ אהגה כיונא דלו עיני למרום אדוני עושקה לי וערבני 1Q8כסיס עגור כן [יהוה] חשקה [לי] ערבני
15МТמָֽה אֲדַבֵּ֥ר וְאָֽמַר לִ֖י וְה֣וּא עָשָׂ֑ה אֶדַּדֶּ֥ה כָל שְׁנוֹתַ֖י עַל מַ֥ר נַפְשִֽׁי 1Qisaaמה אדבר ואומר לוא והיאה עשה ליא אדודה כול שנותי על מור נפשיא
16МТאֲדֹנָ֖י עֲלֵיהֶ֣ם יִֽחְי֑וּ וּלְכָל בָּהֶן֙ חַיֵּ֣י רוּחִ֔י וְתַחֲלִימֵ֖נִי וְהַחֲיֵֽנִי 1Qisaaאדוני עליהמה וחיו ולכול בהמה חיו רוחו ותחלימני והחיני 1Q8אדני [עליהם] יחיו ולכל בהן [תחלימני] והחיני
17МТהִנֵּ֥ה לְשָׁל֖וֹם מַר לִ֣י מָ֑ר וְאַתָּ֞ה חָשַׁ֤קְתָּ נַפְשִׁי֙ מִשַּׁ֣חַת בְּלִ֔י כִּ֥י הִשְׁלַ֛כְתָּ אַחֲרֵ֥י גֵוְךָ֖ כָּל חֲטָאָֽי 1Qisaaהן לשלום מר ליא מאודה ואתה חשקתה נפשי משחת כלי כיא השלכתה אחרי גוכה כול חטאי 1Q8הנה לי מר ואתה חשקת נפשי מ לי כי השלכת אחרי גוך כל חטאי
18МТכִּ֣י לֹ֥א שְׁא֛וֹל תּוֹדֶ֖ךָּ מָ֣וֶת יְהַלְלֶ֑ךָּ לֹֽא יְשַׂבְּר֥וּ יֽוֹרְדֵי ב֖וֹר אֶל אֲמִתֶּֽךָ 1Qisaaכיא לוא שאול תודכה ולוא מות יהללכה ולוא ישברו יורדי בור אל אמתכה 1Q8כי שאול תועך מות יהללך לא ישברו יורדי בור אל אמתך
19МТחַ֥י חַ֛י ה֥וּא יוֹדֶ֖ךָ כָּמ֣וֹנִי הַיּ֑וֹם אָ֣ב לְבָנִ֔ים יוֹדִ֖יעַ אֶל אֲמִתֶּֽךָ 1Qisaaחי חי הוא יודכה כמוני היום אב לבנים יודיע אל אמתכה 1Q8חי חי הוא יודך [היום] כמוני אב לבנים יודע אלה אמתך
20МТיְהוָ֖ה לְהוֹשִׁיעֵ֑נִי וּנְגִנוֹתַ֧י נְנַגֵּ֛ן כָּל יְמֵ֥י חַיֵּ֖ינוּ עַל בֵּ֥ית יְהוָֽה 1Qisaaיהוה להושיעני חי חי יודך כמוני היום אב לבנים יהודיע אלוה אמתך יהוה להושיעני ונגנותי ננגן כול ימי חיינו על בית יהוה 1Q8יהוה להשיעני ונגנותי ננגן כל ימי חיינו על בית יהוה
21МТוַיֹּ֣אמֶר יְשַׁעְיָ֔הוּ יִשְׂא֖וּ דְּבֶ֣לֶת תְּאֵנִ֑ים וְיִמְרְח֥וּ עַֽל הַשְּׁחִ֖ין וְיֶֽחִי 1Qisaaויאומר ישעיהו דבלת תאנים וימרחו על השחין ויחי 1Q8ויאמר ישעיהו ישאו דבלת תאנים וימרחו אל השחין ויחי
22МТוַיֹּ֥אמֶר חִזְקִיָּ֖הוּ מָ֣ה א֑וֹת כִּ֥י אֶעֱלֶ֖ה בֵּ֥ית יְהוָֽה 1Qisaaויאמר חזקיה מה אות כי אעלה בית יהוה