Исаии, глава 60
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТק֥וּמִי א֖וֹרִי כִּ֣י בָ֣א אוֹרֵ֑ךְ וּכְב֥וֹד יְהוָ֖ה עָלַ֥יִךְ זָרָֽח 1Qisaaקומי אורי כיא בא אורך כבוד יהוה עליכה זרח
2МТכִּֽי הִנֵּ֤ה הַחֹ֙שֶׁךְ֙ יְכַסֶּה אֶ֔רֶץ וַעֲרָפֶ֖ל לְאֻמִּ֑ים וְעָלַ֙יִךְ֙ יִזְרַ֣ח יְהוָ֔ה וּכְבוֹד֖וֹ עָלַ֥יִךְ יֵרָאֶֽה 1Qisaaכיא הנה החושך יכסה ארץ וערפל לאומים ועליך יזרח יהוה וכבודו עליך יראה 1Q8[כי] הנה החשך יכסה ארץ והערפל לאמים ועליך [יזרח] [יהוה] וכבדו עליך יראה
3МТוְהָלְכ֥וּ גוֹיִ֖ם לְאוֹרֵ֑ךְ וּמְלָכִ֖ים לְנֹ֥גַהּ זַרְחֵֽךְ 1Qisaaוהלכו גואים לאורך ומלכים לנגד זרחך
4МТשְׂאִֽי סָבִ֤יב עֵינַ֙יִךְ֙ וּרְאִ֔י כֻּלָּ֖ם נִקְבְּצ֣וּ בָֽאוּ לָ֑ךְ בָּנַ֙יִךְ֙ מֵרָח֣וֹק יָבֹ֔אוּ וּבְנֹתַ֖יִךְ עַל צַ֥ד תֵּאָמַֽנָה 1Qisaaשאי סביב עיניך וראי כולמה נקבצו באו לך בניך מרחוק יבואו ובנותיך על צד תאמנה 1Q8שאי סביב עיניך וראי כלם נקבצו באו לך בניך [מרחוק] יבאו ובנתיך על צד תנשינה
5МТאָ֤ז תִּרְאִי֙ וְנָהַ֔רְתְּ וּפָחַ֥ד וְרָחַ֖ב לְבָבֵ֑ךְ כִּֽי יֵהָפֵ֤ךְ עָלַ֙יִךְ֙ הֲמ֣וֹן יָ֔ם חֵ֥יל גּוֹיִ֖ם יָבֹ֥אוּ לָֽךְ 1Qisaaאז תראי ונהר ורחב לבבך כיא יהפך אליך המון ים חיל גואים יבואו לכ 1Q8אז תראי ונהרת ופחד [ורחב] לבבך כי יהפך אליך המון ים חיל גוים יבוא לך
6МТשִֽׁפְעַ֨ת גְּמַלִּ֜ים תְּכַסֵּ֗ךְ בִּכְרֵ֤י מִדְיָן֙ וְעֵיפָ֔ה כֻּלָּ֖ם מִשְּׁבָ֣א יָבֹ֑אוּ זָהָ֤ב וּלְבוֹנָה֙ יִשָּׂ֔אוּ וּתְהִלֹּ֥ת יְהוָ֖ה יְבַשֵּֽׂרוּ 1Qisaaשפעת גמלים תכסך בכרי מדים ועיפו כולם משבאו יבואו זהב ולבונה ישאו ותהלת יהוה יבשרו 1Q8שפעת גמלים תכסך בכרי מדין ועיפה כלם משבא יבאו זהב ולבנה ישאו ותהלת [יהוה] יבשרון
7МТכָּל צֹ֤אן קֵדָר֙ יִקָּ֣בְצוּ לָ֔ךְ אֵילֵ֥י נְבָי֖וֹת יְשָׁרְת֑וּנֶךְ יַעֲל֤וּ עַל רָצוֹן֙ מִזְבְּחִ֔י וּבֵ֥ית תִּפְאַרְתִּ֖י אֲפָאֵֽר 1Qisaaכול צואן קדר יקבצו לך אילי נבאות ישרתונך ויעלו לרצון על מזבחי ובית תפארתי אפאר
8МТמִי אֵ֖לֶּה כָּעָ֣ב תְּעוּפֶ֑ינָה וְכַיּוֹנִ֖ים אֶל אֲרֻבֹּתֵיהֶֽם 1Qisaaמיא אלה כעב תעופפנה וכיונים אל ארבותיהמה 1Q8מי אלה כעב תעפינה [וכיונים] על ארבתיהם
9МТכִּֽי לִ֣י אִיִּ֣ים יְקַוּ֗וּ וָאֳנִיּ֤וֹת תַּרְשִׁישׁ֙ בָּרִ֣אשֹׁנָ֔ה לְהָבִ֤יא בָנַ֙יִךְ֙ מֵֽרָח֔וֹק כַּסְפָּ֥ם וּזְהָבָ֖ם אִתָּ֑ם לְשֵׁם֙ יְהוָ֣ה אֱלֹהַ֔יִךְ וְלִקְד֥וֹשׁ יִשְׂרָאֵ֖ל כִּ֥י פֵאֲרָֽךְ 1Qisaaכיא ליא איים יקוו ואניות תרשיש ברישונה להביא בני מרחוק כספם וזהבם אתם לשמ יהוה אלוהיך ולקדוש ישראל כיא פארך
10МТוּבָנ֤וּ בְנֵֽי נֵכָר֙ חֹמֹתַ֔יִךְ וּמַלְכֵיהֶ֖ם יְשָׁרְת֑וּנֶךְ כִּ֤י בְקִצְפִּי֙ הִכִּיתִ֔יךְ וּבִרְצוֹנִ֖י רִֽחַמְתִּֽיךְ 1Qisaaובנו בני נכר חומותיך ומלכיהמה ישרתונך כיא בקצפי הכיתיך וברצוני רחמתיך 1Q8ובנו בני נכר חמתיך ומלכיהם ישרתונך כי בקצפי הכיתיך וברצני רחמתיך
11МТוּפִתְּח֨וּ שְׁעָרַ֧יִךְ תָּמִ֛יד יוֹמָ֥ם וָלַ֖יְלָה לֹ֣א יִסָּגֵ֑רוּ לְהָבִ֤יא אֵלַ֙יִךְ֙ חֵ֣יל גּוֹיִ֔ם וּמַלְכֵיהֶ֖ם נְהוּגִֽים 1Qisaaופתחו שעריך תמיד יוממ ולילה ולוא יסגרו להביא אליך חיל גואים ומלכיהמה נהוגים
12МТכִּֽי הַגּ֧וֹי וְהַמַּמְלָכָ֛ה אֲשֶׁ֥ר לֹא יַעַבְד֖וּךְ יֹאבֵ֑דוּ וְהַגּוֹיִ֖ם חָרֹ֥ב יֶחֱרָֽבוּ 1Qisaaכיא הגוי והממלכה אשר לוא יעבודוכי יאבדו והגואים חרוב יחרבו 1Q8כי הגוי והממלכה אשר לא יעבדוך יאבדו והגוים חרוב יחרבו
13МТכְּב֤וֹד הַלְּבָנוֹן֙ אֵלַ֣יִךְ יָב֔וֹא בְּר֛וֹשׁ תִּדְהָ֥ר וּתְאַשּׁ֖וּר יַחְדָּ֑ו לְפָאֵר֙ מְק֣וֹם מִקְדָּשִׁ֔י וּמְק֥וֹם רַגְלַ֖י אֲכַבֵּֽד 1Qisaaכבוד הלבנון נתן לך ואליך יבוא ברוש ותהרהר ותאשור יחדיו לפאר מקום מקדשי ומקום רגלי אכבד 1Q8כבוד הלבנון אליך יבוא בראש תרהר ותאשור יחדיו לפאר מקום מקדשי ומקום רגלי אכבד
14МТוְהָלְכ֨וּ אֵלַ֤יִךְ שְׁח֙וֹחַ֙ בְּנֵ֣י מְעַנַּ֔יִךְ וְהִֽשְׁתַּחֲו֛וּ עַל כַּפּ֥וֹת רַגְלַ֖יִךְ כָּל מְנַֽאֲצָ֑יִךְ וְקָ֤רְאוּ לָךְ֙ עִ֣יר יְהוָ֔ה צִיּ֖וֹן קְד֥וֹשׁ יִשְׂרָאֵֽל 1Qisaaואהלכו אליך שחוח כול בני מנעציך מעניך והשתחוו על כפות רגליך כול מנאציך וקראו לך עיר יהוה ציון קדוש ישראל 1Q8והלכו אליך שחוח כל [בני] והשתחוו על כפות רגליך כל מנאציך וקראו לך עיר [ציון] קדוש ישראל
15МТתַּ֧חַת הֱיוֹתֵ֛ךְ עֲזוּבָ֥ה וּשְׂנוּאָ֖ה וְאֵ֣ין עוֹבֵ֑ר וְשַׂמְתִּיךְ֙ לִגְא֣וֹן עוֹלָ֔ם מְשׂ֖וֹשׂ דּ֥וֹר וָדֽוֹר 1Qisaaתחת הייותך עזובה ושנואה ואין עובר ושמתיך לגאון עולם משוש דור ודור
16МТוְיָנַקְתְּ֙ חֲלֵ֣ב גּוֹיִ֔ם וְשֹׁ֥ד מְלָכִ֖ים תִּינָ֑קִי וְיָדַ֗עַתְּ כִּ֣י אֲנִ֤י יְהוָה֙ מֽוֹשִׁיעֵ֔ךְ וְגֹאֲלֵ֖ךְ אֲבִ֥יר יַעֲקֹֽב 1Qisaaוינקתי חלב גואים ושד מלכים תינקי וידעתי כיא אני יהוה מושיעך וגואלך אביר יעקוב 1Q8וינקת חלב [גוים] ושד מלכים תינקי וידעת כי אני יהוה מושיעך וגואלך אביר יעקב
17МТתַּ֣חַת הַנְּחֹ֜שֶׁת אָבִ֣יא זָהָ֗ב וְתַ֤חַת הַבַּרְזֶל֙ אָ֣בִיא כֶ֔סֶף וְתַ֤חַת הָֽעֵצִים֙ נְחֹ֔שֶׁת וְתַ֥חַת הָאֲבָנִ֖ים בַּרְזֶ֑ל וְשַׂמְתִּ֤י פְקֻדָּתֵךְ֙ שָׁל֔וֹם וְנֹגְשַׂ֖יִךְ צְדָקָֽה 1Qisaaתחת הנחושת אביא זהב ותחת הברזל אביא כסף ותחת העצים נחושת ותחת האבנים ברזל ושמתי פקודתך שלום ונוגשיך צדקה
18МТלֹא יִשָּׁמַ֨ע ע֤וֹד חָמָס֙ בְּאַרְצֵ֔ךְ שֹׁ֥ד וָשֶׁ֖בֶר בִּגְבוּלָ֑יִךְ וְקָרָ֤את יְשׁוּעָה֙ חוֹמֹתַ֔יִךְ וּשְׁעָרַ֖יִךְ תְּהִלָּֽה 1Qisaaולוא ישמע עוד חמס בארצך שד ושבר בגבוליך וקראתה הישועה חומותיך ושעריך תהלה 1Q8לא ישמע עוד חמס בארצך שד ושבר בגבולך וקראת ישועה [חמתיך] ושעריך תהלה
19МТלֹא יִֽהְיֶה לָּ֨ךְ ע֤וֹד הַשֶּׁ֙מֶשׁ֙ לְא֣וֹר יוֹמָ֔ם וּלְנֹ֕גַהּ הַיָּרֵ֖חַ לֹא יָאִ֣יר לָ֑ךְ וְהָיָה לָ֤ךְ יְהוָה֙ לְא֣וֹר עוֹלָ֔ם וֵאלֹהַ֖יִךְ לְתִפְאַרְתֵּֽךְ 1Qisaaלוא יהיה לך עוד השמש לאור יוממ ולנוגה הירח בלילה לוא יאיר לך והיה לך יהוה לאור עולם ואלוהיך לתפארתך
20МТלֹא יָב֥וֹא עוֹד֙ שִׁמְשֵׁ֔ךְ וִירֵחֵ֖ךְ לֹ֣א יֵאָסֵ֑ף כִּ֣י יְהוָ֗ה יִֽהְיֶה לָּךְ֙ לְא֣וֹר עוֹלָ֔ם וְשָׁלְמ֖וּ יְמֵ֥י אֶבְלֵֽךְ 1Qisaaלוא יבוא שמשך וירחך לוא יאסף כיא יהוה יהיה לך לאור עולם ושלמו ימי אבלך
21МТוְעַמֵּךְ֙ כֻּלָּ֣ם צַדִּיקִ֔ים לְעוֹלָ֖ם יִ֣ירְשׁוּ אָ֑רֶץ נֵ֧צֶר מַטָּעַ֛י מַעֲשֵׂ֥ה יָדַ֖י לְהִתְפָּאֵֽר 1Qisaaועמך כולם צדיקים לעולם ירשו ארץ נצר מטעי יהוה מעשי ידיו להתפאר 1Q8ועמך כלם צדיקים לעולם יירשו ארץ מטעיו מעשה ידיו להתפאר
22МТהַקָּטֹן֙ יִֽהְיֶ֣ה לָאֶ֔לֶף וְהַצָּעִ֖יר לְג֣וֹי עָצ֑וּם אֲנִ֥י יְהוָ֖ה בְּעִתָּ֥הּ אֲחִישֶֽׁנָּה