Исаии, глава 43
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТוְעַתָּ֞ה כֹּֽה אָמַ֤ר יְהוָה֙ בֹּרַאֲךָ֣ יַעֲקֹ֔ב וְיֹצֶרְךָ֖ יִשְׂרָאֵ֑ל אַל תִּירָא֙ כִּ֣י גְאַלְתִּ֔יךָ קָרָ֥אתִי בְשִׁמְךָ֖ לִי אָֽתָּה 1Qisaaועתה כוה אמר יהוה בוראיכה יעקוב ויוצריכה ישראל אל תירא כיא גאלתיכה קראתי בשמכה ליא אתה 1Q8[אמר] יהוה בוראך יעקב [קראתי] [בשמך] לי אתה
2МТכִּֽי תַעֲבֹ֤ר בַּמַּ֙יִם֙ אִתְּךָ אָ֔נִי וּבַנְּהָר֖וֹת לֹ֣א יִשְׁטְפ֑וּךָ כִּֽי תֵלֵ֤ךְ בְּמוֹ אֵשׁ֙ לֹ֣א תִכָּוֶ֔ה וְלֶהָבָ֖ה לֹ֥א תִבְעַר בָּֽךְ 1Qisaaכיא תעבור במים אתכה אני ובנהרות לוא ישטפוך כיא תלך במו אש לוא תכוה ולהבה לוא תבער בכה 1Q8כי [תעבר] כי תלך [במואש] לא תכוה [ולהבה] [תבער] בך
3МТכִּ֗י אֲנִי֙ יְהוָ֣ה אֱלֹהֶ֔יךָ קְד֥וֹשׁ יִשְׂרָאֵ֖ל מוֹשִׁיעֶ֑ךָ נָתַ֤תִּי כָפְרְךָ֙ מִצְרַ֔יִם כּ֥וּשׁ וּסְבָ֖א תַּחְתֶּֽיךָ 1Qisaaאני יהוה אלוהיכה קדוש ישראל גואלך ונתתי מצרים כופרך כוש וסבאים תחתיכה
4МТמֵאֲשֶׁ֨ר יָקַ֧רְתָּ בְעֵינַ֛י נִכְבַּ֖דְתָּ וַאֲנִ֣י אֲהַבְתִּ֑יךָ וְאֶתֵּ֤ן אָדָם֙ תַּחְתֶּ֔יךָ וּלְאֻמִּ֖ים תַּ֥חַת נַפְשֶֽׁךָ 1Qisaaמאשר יקרתה בעיני נכבדתה ואני אהבתיכה אתן האדם תחתיכה ולאומים תחת נפשכה 1Q8מאשר יקרת [בעיני] נכבדת ואני [אהבתיך] ואתנה אדם תחתיך ולאמים תחת נפשך
5МТאַל תִּירָ֖א כִּ֣י אִתְּךָ אָ֑נִי מִמִּזְרָח֙ אָבִ֣יא זַרְעֶ֔ךָ וּמִֽמַּעֲרָ֖ב אֲקַבְּצֶֽךָּ 1Qisaaאל תירא כיא אתכה אני ממזרח אביא זרעכה וממערב אקבצכה
6МТאֹמַ֤ר לַצָּפוֹן֙ תֵּ֔נִי וּלְתֵימָ֖ן אַל תִּכְלָ֑אִי הָבִ֤יאִי בָנַי֙ מֵרָח֔וֹק וּבְנוֹתַ֖י מִקְצֵ֥ה הָאָֽרֶץ 1Qisaaאומר לצפון תני ולתימן אל תכלאי הביאו בני מרחוק ובנותי מקצוי הארץ 1Q8אומר לצפון תני ולתימן אל תכלאי [הביאו] [בניך] מרחוק ובנתיך מקצה הארץ
7МТכֹּ֚ל הַנִּקְרָ֣א בִשְׁמִ֔י וְלִכְבוֹדִ֖י בְּרָאתִ֑יו יְצַרְתִּ֖יו אַף עֲשִׂיתִֽיו 1Qisaaכול הנקרא בשמי ולכבודי בראתיהו יצרתיהו אפ עשיתיהו 1Q8כל הנקרא בשמי ולכבדי בראתיו [יצרתיו] ואף עשיתיו
8МТהוֹצִ֥יא עַם עִוֵּ֖ר וְעֵינַ֣יִם יֵ֑שׁ וְחֵרְשִׁ֖ים וְאָזְנַ֥יִם לָֽמוֹ 1Qisaaהוציאו עמ עואר עינים יש וחרשים ואוזנים למו 1Q8אוציא עם עור ועינים יש וחרשים ואזנים למו
9МТכָּֽל הַגּוֹיִ֞ם נִקְבְּצ֣וּ יַחְדָּ֗ו וְיֵאָֽסְפוּ֙ לְאֻמִּ֔ים מִ֤י בָהֶם֙ יַגִּ֣יד זֹ֔את וְרִֽאשֹׁנ֖וֹת יַשְׁמִיעֻ֑נוּ יִתְּנ֤וּ עֵֽדֵיהֶם֙ וְיִצְדָּ֔קוּ וְיִשְׁמְע֖וּ וְיֹאמְר֥וּ אֱמֶֽת 1Qisaaכול הגואים נקבצו יחדיו ויאספו לאומים מי בהמה ויגידו זואת ורישונות ישמיעו יתנו עדיהמה ויצדקו וישמיעו ויואמרו אמת 1Q8כל הגוים נקבצו יחדיו ויאספו לאמים מי בהם יגידו זאת [ישמיענו] [יתנו] עדיהם ויצדקו וישמעו ויאמרו אמת
10МТאַתֶּ֤ם עֵדַי֙ נְאֻם יְהוָ֔ה וְעַבְדִּ֖י אֲשֶׁ֣ר בָּחָ֑רְתִּי לְמַ֣עַן תֵּ֠דְעוּ וְתַאֲמִ֨ינוּ לִ֤י וְתָבִ֙ינוּ֙ כִּֽי אֲנִ֣י ה֔וּא לְפָנַי֙ לֹא נ֣וֹצַר אֵ֔ל וְאַחֲרַ֖י לֹ֥א יִהְיֶֽה 1Qisaaאתמה עדי נואמ יהוה עבדי אשר בחרתי למען תדעו ותאמינו ליא ותבינו כיא אני הואה לפני לוא נוצר אל ואחרי לוא היה 1Q8[אתם] [אשר] בחרתי למען תדעו ותאמינו לי [ותבינו] אחריו לא יהיה
11МТאָנֹכִ֥י אָנֹכִ֖י יְהוָ֑ה וְאֵ֥ין מִבַּלְעָדַ֖י מוֹשִֽׁיעַ 1Qisaaאנוכי אנוכי יהוה ואין מבלעדי מושיע
12МТאָנֹכִ֞י הִגַּ֤דְתִּי וְהוֹשַׁ֙עְתִּי֙ וְהִשְׁמַ֔עְתִּי וְאֵ֥ין בָּכֶ֖ם זָ֑ר וְאַתֶּ֥ם עֵדַ֛י נְאֻם יְהוָ֖ה וַֽאֲנִי אֵֽל 1Qisaaאנוכי הגדתי והושעתי והשמעתי ואין בכמה זר ואתמה עדי נואמ יהוה אני אל 1Q8[הושעתי] השמעתי ואין [בכם] [ואתם] [עדי]
13МТגַּם מִיּוֹם֙ אֲנִ֣י ה֔וּא וְאֵ֥ין מִיָּדִ֖י מַצִּ֑יל אֶפְעַ֖ל וּמִ֥י יְשִׁיבֶֽנָּה 1Qisaaגמ מיום אני הואה ואין מידי מציל אפעולה ומי ישיבנה 1Q8[אין] מידי מציל [אפעל]
14МТכֹּֽה אָמַ֧ר יְהוָ֛ה גֹּאַלְכֶ֖ם קְד֣וֹשׁ יִשְׂרָאֵ֑ל לְמַעַנְכֶ֞ם שִׁלַּ֣חְתִּי בָבֶ֗לָה וְהוֹרַדְתִּ֤י בָֽרִיחִים֙ כֻּלָּ֔ם וְכַשְׂדִּ֖ים בָּאֳנִיּ֥וֹת רִנָּתָֽם 1Qisaaכוה אמר יהוה גואלכמה קדוש ישראל למענכמה שלחתי בבבל והורדתי בריחים כולם וכשדיים באוניות רנתמה
15МТאֲנִ֥י יְהוָ֖ה קְדֽוֹשְׁכֶ֑ם בּוֹרֵ֥א יִשְׂרָאֵ֖ל מַלְכְּכֶֽם 1Qisaaאני יהוה קדושכמה בורא ישראל מלככמה
16МТכֹּ֚ה אָמַ֣ר יְהוָ֔ה הַנּוֹתֵ֥ן בַּיָּ֖ם דָּ֑רֶךְ וּבְמַ֥יִם עַזִּ֖ים נְתִיבָֽה 1Qisaaכוה אמר יהוה הנותן בים דרך ובמים עזים נתיבה
17МТהַמּוֹצִ֥יא רֶֽכֶב וָס֖וּס חַ֣יִל וְעִזּ֑וּז יַחְדָּ֤ו יִשְׁכְּבוּ֙ בַּל יָק֔וּמוּ דָּעֲכ֖וּ כַּפִּשְׁתָּ֥ה כָבֽוּ 1Qisaaהמוציא רכב וסוס וחיל ועוזוז יחדיו ישכובו בל יקומו דעכו כפשתה כבו
18МТאַֽל תִּזְכְּר֖וּ רִֽאשֹׁנ֑וֹת וְקַדְמֹנִיּ֖וֹת אַל תִּתְבֹּנָֽנוּ 1Qisaaאל תזכור רישונות וקדמוניות אל תתבוננו
19МТהִנְנִ֨י עֹשֶׂ֤ה חֲדָשָׁה֙ עַתָּ֣ה תִצְמָ֔ח הֲל֖וֹא תֵֽדָע֑וּהָ אַ֣ף אָשִׂ֤ים בַּמִּדְבָּר֙ דֶּ֔רֶךְ בִּֽישִׁמ֖וֹן נְהָרֽוֹת 1Qisaaהנני עושה חדשה ועתה תצמח הלוא תדעו אף אשים במדבר דרך בישומון נתיבות 4Q61[חדשה] [מדבר] דרך [בישמון] ת
20МТתְּכַבְּדֵ֙נִי֙ חַיַּ֣ת הַשָּׂדֶ֔ה תַּנִּ֖ים וּבְנ֣וֹת יַֽעֲנָ֑ה כִּֽי נָתַ֨תִּי בַמִּדְבָּ֜ר מַ֗יִם נְהָרוֹת֙ בִּֽישִׁימֹ֔ן לְהַשְׁק֖וֹת עַמִּ֥י בְחִירִֽי 1Qisaaתכבדני חית השדה תנים ובנות יענה כיא אתן במדבר מים נהרות בישומון להשקות עמי ובחירי 4Q61במדבר מים נהרת [ישימן] [השקות]
21МТעַם זוּ֙ יָצַ֣רְתִּי לִ֔י תְּהִלָּתִ֖י יְסַפֵּֽרוּ 1Qisaaעמ זה יצרתי לי ותהלתי יואמרו
22МТוְלֹא אֹתִ֥י קָרָ֖אתָ יַֽעֲקֹ֑ב כִּֽי יָגַ֥עְתָּ בִּ֖י יִשְׂרָאֵֽל 1Qisaaולוא אותי קראתה יעקוב כיא יגעתה ביא ישראל
23МТלֹֽא הֵבֵ֤יאתָ לִּי֙ שֵׂ֣ה עֹלֹתֶ֔יךָ וּזְבָחֶ֖יךָ לֹ֣א כִבַּדְתָּ֑נִי לֹ֤א הֶעֱבַדְתִּ֙יךָ֙ בְּמִנְחָ֔ה וְלֹ֥א הוֹגַעְתִּ֖יךָ בִּלְבוֹנָֽה 1Qisaaלוא הביאותה לי שה לעולה ובזבחיכה לוא כבדתני ולוא עשיתה ליא מנחה ולוא הוגעתיכה בלבונה 1Q8הביאות לי שה עלתיך ו בלבונה 4Q61לוא [הביאת] לי שה עולותיך לא העבדתיך במנחה ולא [הוגעתיך] בלבנה
24МТלֹא קָנִ֨יתָ לִּ֤י בַכֶּ֙סֶף֙ קָנֶ֔ה וְחֵ֥לֶב זְבָחֶ֖יךָ לֹ֣א הִרְוִיתָ֑נִי אַ֗ךְ הֶעֱבַדְתַּ֙נִי֙ בְּחַטֹּאותֶ֔יךָ הוֹגַעְתַּ֖נִי בַּעֲוֹנֹתֶֽיךָ 1Qisaaלוא קניתה ליא בכסף קנה וחלב זבחיכה לוא הרויתני אך העבדתני בחטאותיכה הוגעתני בעונכה 1Q8לא קנית לי [בכסף] [חטאותיך] הוגעתני [בעונתיך] 4Q61ולוא [קנה] וחלב זבחיך לא הרויתני
25МТאָנֹכִ֨י אָנֹכִ֥י ה֛וּא מֹחֶ֥ה פְשָׁעֶ֖יךָ לְמַעֲנִ֑י וְחַטֹּאתֶ֖יךָ לֹ֥א אֶזְכֹּֽר 1Qisaaאנוכי אנוכי הואה מוחה פשעכה למעני וחטאתיכה לוא אזכור עוד
26МТהַזְכִּירֵ֕נִי נִשָּׁפְטָ֖ה יָ֑חַד סַפֵּ֥ר אַתָּ֖ה לְמַ֥עַן תִּצְדָּֽק 1Qisaaהזכירוני נשפטה יחדיו ספר אתה למען תצדק
27МТאָבִ֥יךָ הָרִאשׁ֖וֹן חָטָ֑א וּמְלִיצֶ֖יךָ פָּ֥שְׁעוּ בִֽי 1Qisaaאביכה הרישון חטא ומליציכה פשעו ביא
28МТוַאֲחַלֵּ֖ל שָׂ֣רֵי קֹ֑דֶשׁ וְאֶתְּנָ֤ה לַחֵ֙רֶם֙ יַעֲקֹ֔ב וְיִשְׂרָאֵ֖ל לְגִדּוּפִֽים 1Qisaaואחללה שרי קודש ואתן לחרם יעקוב וישראל לגודפים