Исаии, глава 56
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТכֹּ֚ה אָמַ֣ר יְהוָ֔ה שִׁמְר֥וּ מִשְׁפָּ֖ט וַעֲשׂ֣וּ צְדָקָ֑ה כִּֽי קְרוֹבָ֤ה יְשֽׁוּעָתִי֙ לָב֔וֹא וְצִדְקָתִ֖י לְהִגָּלֽוֹת 1Qisaaכיא כוה אמר יהוה שמורו משפט ועשו צדקה כיא קרובה ישועתי לבוא וצדקתי להגלות
2МТאַשְׁרֵ֤י אֱנוֹשׁ֙ יַעֲשֶׂה זֹּ֔את וּבֶן אָדָ֖ם יַחֲזִ֣יק בָּ֑הּ שֹׁמֵ֤ר שַׁבָּת֙ מֵֽחַלְּל֔וֹ וְשֹׁמֵ֥ר יָד֖וֹ מֵעֲשׂ֥וֹת כָּל רָֽע 1Qisaaאשרי אנוש יעשה זואת ובן אדם יחזיק בה שומר שבת מחללה ושומר ידיו מעשות כול רע 1Q8אשרי אנוש יעשה זאת בן אדם יחזיק בה שומר שבת מחללו [ושומר] ידו מעשות כל רע
3МТוְאַל יֹאמַ֣ר בֶּן הַנֵּכָ֗ר הַנִּלְוָ֤ה אֶל יְהוָה֙ לֵאמֹ֔ר הַבְדֵּ֧ל יַבְדִּילַ֛נִי יְהוָ֖ה מֵעַ֣ל עַמּ֑וֹ וְאַל יֹאמַר֙ הַסָּרִ֔יס הֵ֥ן אֲנִ֖י עֵ֥ץ יָבֵֽשׁ 1Qisaaאל יואמר בן הנכר הנלוא אל יהוה לאמור הבדל יבדילני יהוה מעל עמו ואל יואמר הסריס הנה אנוכי עץ יבש 1Q8ואל [יאמר] בן הנכר הנלוה על יהוה [לאמר] [הבדל] יבדילני יהוה מעל עמו [יאמר] [הסריס] הן אני עץ יבש
4МТכִּי כֹ֣ה אָמַ֣ר יְהוָ֗ה לַסָּֽרִיסִים֙ אֲשֶׁ֤ר יִשְׁמְרוּ֙ אֶת שַׁבְּתוֹתַ֔י וּבָֽחֲר֖וּ בַּאֲשֶׁ֣ר חָפָ֑צְתִּי וּמַחֲזִיקִ֖ים בִּבְרִיתִֽי 1Qisaaכיא כוה אמר יהוה לסריסים אשר ישמורו את שבתותי ויבחורו באשר חפצתי ומחזיקים בבריתי 1Q8כי [כה] לסריסים אשר את שבתתי ובחרו באשר חפצתי בבריתי
5МТוְנָתַתִּ֨י לָהֶ֜ם בְּבֵיתִ֤י וּבְחֽוֹמֹתַי֙ יָ֣ד וָשֵׁ֔ם ט֖וֹב מִבָּנִ֣ים וּמִבָּנ֑וֹת שֵׁ֤ם עוֹלָם֙ אֶתֶּן ל֔וֹ אֲשֶׁ֖ר לֹ֥א יִכָּרֵֽת 1Qisaaונתתי להמה בביתי ובחומותי יד ושמ טוב מבנים ומן בנות שם עולם אתן להמה אשר לוא יכרת 1Q8ונתתי בביתי ובחמתי יד ושם טוב מבנים מבנות שם עולם אתן לו אשר לא יכרת
6МТוּבְנֵ֣י הַנֵּכָ֗ר הַנִּלְוִ֤ים עַל יְהוָה֙ לְשָׁ֣רְת֔וֹ וּֽלְאַהֲבָה֙ אֶת שֵׁ֣ם יְהוָ֔ה לִהְי֥וֹת ל֖וֹ לַעֲבָדִ֑ים כָּל שֹׁמֵ֤ר שַׁבָּת֙ מֵֽחַלְּל֔וֹ וּמַחֲזִיקִ֖ים בִּבְרִיתִֽי 1Qisaaובני הנכר הנלויים אל יהוה להיות לו לעבדים ולברך את שמ יהוה ושומרים את השבת מחללה ומחזיקים בבריתי
7МТוַהֲבִיאוֹתִ֞ים אֶל הַ֣ר קָדְשִׁ֗י וְשִׂמַּחְתִּים֙ בְּבֵ֣ית תְּפִלָּתִ֔י עוֹלֹתֵיהֶ֧ם וְזִבְחֵיהֶ֛ם לְרָצ֖וֹן עַֽל מִזְבְּחִ֑י כִּ֣י בֵיתִ֔י בֵּית תְּפִלָּ֥ה יִקָּרֵ֖א לְכָל הָעַמִּֽים 1Qisaaוהביאותים אל הר קודשי ושמחתים בבית תפלתי עולותיהםה וזבחיהמה יעלו לרצון על מזבחי כיא ביתי בית תפלה יקרה לכול העמים 1Q8והביאתים אל הר קדשי [ושמחתים] בבית תפלתי עלתיהם וזבחיהם לרצון על מזבחי כי ביתי בית [תפלה] יקרא לכל העמים 4Q62a[עולותיהם] וזבחיהם לרצון על מזבחי כי ביתי [בית]
8МТנְאֻם֙ אֲדֹנָ֣י יְהוִ֔ה מְקַבֵּ֖ץ נִדְחֵ֣י יִשְׂרָאֵ֑ל ע֛וֹד אֲקַבֵּ֥ץ עָלָ֖יו לְנִקְבָּצָֽיו 1Qisaaנואמ אדוני יהוה מקבץ נדחי ישראל עוד אקבץ עליו לנקבציו 1Q8נאם אדני יהוה מקבץ נדחי ישראל עוד [אקבץ] לנקבצו
9МТכֹּ֖ל חַיְת֣וֹ שָׂדָ֑י אֵתָ֕יוּ לֶאֱכֹ֥ל כָּל חַיְת֖וֹ בַּיָּֽעַר 1Qisaaכול חיות שדה אתיו לאכול וכול חיות ביער 1Q8כל חיתו שדי [אתיו] לאכל כל חייתו ביער
10МТצֹפָ֞יו עִוְרִ֤ים כֻּלָּם֙ לֹ֣א יָדָ֔עוּ כֻּלָּם֙ כְּלָבִ֣ים אִלְּמִ֔ים לֹ֥א יוּכְל֖וּ לִנְבֹּ֑חַ הֹזִים֙ שֹֽׁכְבִ֔ים אֹהֲבֵ֖י לָנֽוּם 1Qisaaצופיו עורים כולם לוא ידעו כולם כלבים אלמים לוא יוכלו לנבוח המה חוזים שוכבים אוהבים לנואם 1Q8[צפ] [כלם] לא ידעו כלם כלבים אלמים לא יכלו לנבח הזים [שכבים] [אהב] לנום
11МТוְהַכְּלָבִ֣ים עַזֵּי נֶ֗פֶשׁ לֹ֤א יָֽדְעוּ֙ שָׂבְעָ֔ה וְהֵ֣מָּה רֹעִ֔ים לֹ֥א יָדְע֖וּ הָבִ֑ין כֻּלָּם֙ לְדַרְכָּ֣ם פָּנ֔וּ אִ֥ישׁ לְבִצְע֖וֹ מִקָּצֵֽהוּ 1Qisaaוהכלבים עזי נפש לוא ידעו שבעה והמה הרועים לוא ידעו הבין כולם לדרכם פנו איש לבצעו מקצהו 1Q8והכלבים עזי נפש לא ידעו שבעה והם רעים לא [ידעו] הבין כלם לדרכם פנו איש לבצעו מקצהו
12МТאֵתָ֥יוּ אֶקְחָה יַ֖יִן וְנִסְבְּאָ֣ה שֵׁכָ֑ר וְהָיָ֤ה כָזֶה֙ י֣וֹם מָחָ֔ר גָּד֖וֹל יֶ֥תֶר מְאֹֽד 1Qisaaאתיו ונקח יין ונסבה שכר ויהי כזה היום ומחר גדול יתר מואד 1Q8אתיו אקח יין ונסבאה שכר והיה כזה [יום] גדול יתר מאד