Исаии, глава 39
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТבָּעֵ֣ת הַהִ֡וא שָׁלַ֡ח מְרֹדַ֣ךְ בַּ֠לְאֲדָן בֶּֽן בַּלְאֲדָ֧ן מֶֽלֶךְ בָּבֶ֛ל סְפָרִ֥ים וּמִנְחָ֖ה אֶל חִזְקִיָּ֑הוּ וַיִּשְׁמַ֕ע כִּ֥י חָלָ֖ה וַֽיֶּחֱזָֽק 1Qisaaבעת ההיא שלח מרודך בלאדון בן בלאדון מלך בבל ספרים ומנחה אל יחוזקיה וישמע כיא חלה ויחיה 1Q8בעת ההיא שלח מרדך בלאדן [בן] [אל] חזקיהו וישמע כי חלה ויחזק 4Q56בעת ההיא [שלח] כי שמע כי [חלה]
2МТוַיִּשְׂמַ֣ח עֲלֵיהֶם֮ חִזְקִיָּהוּ֒ וַיַּרְאֵ֣ם אֶת בֵּ֣ית נְכֹת֡וֹ אֶת הַכֶּסֶף֩ וְאֶת הַזָּהָ֨ב וְאֶת הַבְּשָׂמִ֜ים וְאֵ֣ת הַשֶּׁ֣מֶן הַטּ֗וֹב וְאֵת֙ כָּל בֵּ֣ית כֵּלָ֔יו וְאֵ֛ת כָּל אֲשֶׁ֥ר נִמְצָ֖א בְּאֹֽצְרֹתָ֑יו לֹֽא הָיָ֣ה דָבָ֗ר אֲ֠שֶׁר לֹֽא הֶרְאָ֧ם חִזְקִיָּ֛הוּ בְּבֵית֖וֹ וּבְכָל מֶמְשַׁלְתּֽוֹ 1Qisaaוישמח עליהמה יחוזקיה ויראמ את כול בית נכתיו את הכסף ואת הזהב ואת הבשמים ואת השמן הטוב ואת כול בית כליו ואת כול אשר נמצא באוצרותיו לוא היה דבר אשר לוא הראם יחוזקיה בביתו ובכול ממלכתו 1Q8וישמח [עליהם] [את] הכסף ואת הזהב ואת הבשמים ואת [אצרתיו] לא היה דבר אשר
3МТוַיָּבֹא֙ יְשַׁעְיָ֣הוּ הַנָּבִ֔יא אֶל הַמֶּ֖לֶךְ חִזְקִיָּ֑הוּ וַיֹּ֨אמֶר אֵלָ֜יו מָ֥ה אָמְר֣וּ הָאֲנָשִׁ֣ים הָאֵ֗לֶּה וּמֵאַ֙יִן֙ יָבֹ֣אוּ אֵלֶ֔יךָ וַיֹּ֙אמֶר֙ חִזְקִיָּ֔הוּ מֵאֶ֧רֶץ רְחוֹקָ֛ה בָּ֥אוּ אֵלַ֖י מִבָּבֶֽל 1Qisaaויבוא ישעיה הנביא אל המלך יחוזקיה ויואמר אליו מה אמרו האנשים האלה ומאין יבואו אליכה ויואמר יחוזקיה מארץ רחוקה באו אלי מבבל 1Q8ויבוא ישעיהו הנביא [אנשים] אלה ומאין יבאו אליך [יאמר] 4Q56ויבא [ישעיהו] [הנביא] [אין] יבאו אליך ו
4МТוַיֹּ֕אמֶר מָ֥ה רָא֖וּ בְּבֵיתֶ֑ךָ וַיֹּ֣אמֶר חִזְקִיָּ֗הוּ אֵ֣ת כָּל אֲשֶׁ֤ר בְּבֵיתִי֙ רָא֔וּ לֹֽא הָיָ֥ה דָבָ֛ר אֲשֶׁ֥ר לֹֽא הִרְאִיתִ֖ים בְּאוֹצְרֹתָֽי 1Qisaaויואמר מה ראו בביתכה ויואמר יחוזקיה את כול אשר בביתי ראו לוא היה דבר אשר לוא הראיתים באוצרותי 1Q8[מה] ראו בביתך ויאמר [חזקיהו] [הראיתם] באצר
5МТוַיֹּ֥אמֶר יְשַׁעְיָ֖הוּ אֶל חִזְקִיָּ֑הוּ שְׁמַ֖ע דְּבַר יְהוָ֥ה צְבָאֽוֹת 1Qisaaויואמר ישעיה אל יחוזקיה שמע דבר יהוה צבאות
6МТהִנֵּה֮ יָמִ֣ים בָּאִים֒ וְנִשָּׂ֣א כָּל אֲשֶׁ֣ר בְּבֵיתֶ֗ךָ וַאֲשֶׁ֨ר אָצְר֧וּ אֲבֹתֶ֛יךָ עַד הַיּ֥וֹם הַזֶּ֖ה בָּבֶ֑ל לֹֽא יִוָּתֵ֥ר דָּבָ֖ר אָמַ֥ר יְהוָֽה 1Qisaaהנה ימים באים ונשאו כול אשר בביתכה ואשר אצרו אבותיכה עד היום הזה בבל יבואו ולוא יותר דבר אמר יהוה 4Q56אצרו אבותיך עד ה [זה] [בבלה]
7МТוּמִבָּנֶ֜יךָ אֲשֶׁ֨ר יֵצְא֧וּ מִמְּךָ֛ אֲשֶׁ֥ר תּוֹלִ֖יד יִקָּ֑חוּ וְהָיוּ֙ סָרִיסִ֔ים בְּהֵיכַ֖ל מֶ֥לֶךְ בָּבֶֽל 1Qisaaומבניכה אשר יצאו ממעיכה אשר תוליד יקחו ויהיו סריסים בהיכל מלך בבל
8МТוַיֹּ֤אמֶר חִזְקִיָּ֙הוּ֙ אֶֽל יְשַׁעְיָ֔הוּ ט֥וֹב דְּבַר יְהוָ֖ה אֲשֶׁ֣ר דִּבַּ֑רְתָּ וַיֹּ֕אמֶר כִּ֥י יִהְיֶ֛ה שָׁל֥וֹם וֶאֱמֶ֖ת בְּיָמָֽי 1Qisaaויואמר יחוזקיה אל ישעיה טוב דבר יהוה אשר דברתה ויואמר כיא יהיה שלום ואמת בימי 4Q56[ישעיהו] טוב דבר יהוה [אשר] דברת ו