Исаии, глава 53
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТמִ֥י הֶאֱמִ֖ין לִשְׁמֻעָתֵ֑נוּ וּזְר֥וֹעַ יְהוָ֖ה עַל מִ֥י נִגְלָֽתָה 1Qisaaמי האמין לשמועתנו וזרוע יהוה אל מי נגלתה 1Q8מי האמין לשמעתנו וזרוע יהוה אל מי נגלתה
2МТוַיַּ֨עַל כַּיּוֹנֵ֜ק לְפָנָ֗יו וְכַשֹּׁ֙רֶשׁ֙ מֵאֶ֣רֶץ צִיָּ֔ה לֹא תֹ֥אַר ל֖וֹ וְלֹ֣א הָדָ֑ר וְנִרְאֵ֥הוּ וְלֹֽא מַרְאֶ֖ה וְנֶחְמְדֵֽהוּ 1Qisaaויעלו כיונק לפניו וכשורש מארץ ציאה לוא תאור לו ולוא הדר לו ונראנו ולוא מראה ונחמדנו 1Q8[יונק] לפניו וכשרש מארץ ציה לא תאר לו ולא הדר [ונראהו] לא מראה ונחמדהו
3МТנִבְזֶה֙ וַחֲדַ֣ל אִישִׁ֔ים אִ֥ישׁ מַכְאֹב֖וֹת וִיד֣וּעַ חֹ֑לִי וּכְמַסְתֵּ֤ר פָּנִים֙ מִמֶּ֔נּוּ נִבְזֶ֖ה וְלֹ֥א חֲשַׁבְנֻֽהוּ 1Qisaaנבזה וחדל אישים ואיש מכאובות ויודע חולי וכמסתיר פנים ממנו ונבוזהו ולוא חשבנוהו 1Q8נבזה וחדל אישים איש מכאבים וידע חלי וכמסתר פנים ממנו ונבזה ולא חשבנהו
4МТאָכֵ֤ן חֳלָיֵ֙נוּ֙ ה֣וּא נָשָׂ֔א וּמַכְאֹבֵ֖ינוּ סְבָלָ֑ם וַאֲנַ֣חְנוּ חֲשַׁבְנֻ֔הוּ נָג֛וּעַ מֻכֵּ֥ה אֱלֹהִ֖ים וּמְעֻנֶּֽה 1Qisaaאכן חוליינו הואה נשא ומכאובינו סבלם ואנחנו חשבנוהי נגוע ומוכה אלוהים ומעונה 1Q8אכן חלינו הוא נשא ומכאבינו סבלם אנחנו חשבנהו נגוע מכה אלהים ומענה
5МТוְהוּא֙ מְחֹלָ֣ל מִפְּשָׁעֵ֔נוּ מְדֻכָּ֖א מֵעֲוֹנֹתֵ֑ינוּ מוּסַ֤ר שְׁלוֹמֵ֙נוּ֙ עָלָ֔יו וּבַחֲבֻרָת֖וֹ נִרְפָּא לָֽנוּ 1Qisaaוהואה מחולל מפשעינו ומדוכא מעוונותינו ומוסר שלומנו עליו ובחבורתיו נרפא לנו 1Q8והוא מחלל מפשעינו ומדכא מעונתינו מוסר שלמנו עליו ובחברתו נרפא לנו
6МТכֻּלָּ֙נוּ֙ כַּצֹּ֣אן תָּעִ֔ינוּ אִ֥ישׁ לְדַרְכּ֖וֹ פָּנִ֑ינוּ וַֽיהוָה֙ הִפְגִּ֣יעַ בּ֔וֹ אֵ֖ת עֲוֹ֥ן כֻּלָּֽנוּ 1Qisaaכולנו כצואן תעינו איש לדרכו פנינו ויהוה הפגיע בו את עוון כולנו 1Q8כלנו [צאן] תעינו איש לדרכו פנינו ויהוה הפגיע בו את עון
7МТנִגַּ֨שׂ וְה֣וּא נַעֲנֶה֮ וְלֹ֣א יִפְתַּח פִּיו֒ כַּשֶּׂה֙ לַטֶּ֣בַח יוּבָ֔ל וּכְרָחֵ֕ל לִפְנֵ֥י גֹזְזֶ֖יהָ נֶאֱלָ֑מָה וְלֹ֥א יִפְתַּ֖ח פִּֽיו 1Qisaaנגש והואה נענה ולוא יפתח פיהו כשה לטבוח יובל כרחל לפני גוזזיה נאלמה ולוא פתח פיהו 1Q8הוא [נענה] ולא [יפתח] פיהו כשה לטבוח יובל [וכרחל] [פיהו]
8МТמֵעֹ֤צֶר וּמִמִּשְׁפָּט֙ לֻקָּ֔ח וְאֶת דּוֹר֖וֹ מִ֣י יְשׂוֹחֵ֑חַ כִּ֤י נִגְזַר֙ מֵאֶ֣רֶץ חַיִּ֔ים מִפֶּ֥שַׁע עַמִּ֖י נֶ֥גַע לָֽמוֹ 1Qisaaמעוצר וממשפט לוקח ואת דורו מיא ישוחח כיא נגזר מארץ חיים מפשע עמו נוגע למו 1Q8מעצר ממשפט לקחו ואת [דורו] [חיים] מפשע עמו נגע למו
9МТוַיִּתֵּ֤ן אֶת רְשָׁעִים֙ קִבְר֔וֹ וְאֶת עָשִׁ֖יר בְּמֹתָ֑יו עַ֚ל לֹא חָמָ֣ס עָשָׂ֔ה וְלֹ֥א מִרְמָ֖ה בְּפִֽיו 1Qisaaויתנו את רשעים קברו ועמת עשירים בומתו על לוא חמס עשה ולוא מרמה בפיהו 4Q58ויתן את [חמס] עשה ולא מרמה [בפיהו]
10МТוַיהוָ֞ה חָפֵ֤ץ דַּכְּאוֹ֙ הֶֽחֱלִ֔י אִם תָּשִׂ֤ים אָשָׁם֙ נַפְשׁ֔וֹ יִרְאֶ֥ה זֶ֖רַע יַאֲרִ֣יךְ יָמִ֑ים וְחֵ֥פֶץ יְהוָ֖ה בְּיָד֥וֹ יִצְלָֽח 1Qisaaויהוה חפץ דכאו ויחללהו אמ תשים אשם נפשו יראה זרע ויארך ימים וחפץ יהוה בידו יצלח 4Q58[דכאו] החלי אם תשם [נפשו] [יראה] זרע והאריך ימים [וחפץ] יצלח
11МТמֵעֲמַ֤ל נַפְשׁוֹ֙ יִרְאֶ֣ה יִשְׂבָּ֔ע בְּדַעְתּ֗וֹ יַצְדִּ֥יק צַדִּ֛יק עַבְדִּ֖י לָֽרַבִּ֑ים וַעֲוֹנֹתָ֖ם ה֥וּא יִסְבֹּֽל 1Qisaaמעמל נפשוה יראה אור וישבע ובדעתו יצדיק צדיק עבדו לרבים ועוונותם הואה יסבול 1Q8מעמל נפשו יראה אור [ישבע] עבדי [לרבים] ועונתם הוא יסבול 4Q58מעמל נפשו יראה [אור] ושבע בדעתו יצדיק צדיק עבדי [לרבים] הוא יסבול
12МТלָכֵ֞ן אֲחַלֶּק ל֣וֹ בָרַבִּ֗ים וְאֶת עֲצוּמִים֮ יְחַלֵּ֣ק שָׁלָל֒ תַּ֗חַת אֲשֶׁ֨ר הֶעֱרָ֤ה לַמָּ֙וֶת֙ נַפְשׁ֔וֹ וְאֶת פֹּשְׁעִ֖ים נִמְנָ֑ה וְהוּא֙ חֵטְא רַבִּ֣ים נָשָׂ֔א וְלַפֹּשְׁעִ֖ים יַפְגִּֽיעַ 1Qisaaלכן אחלק לו ברבים ואת עצומים יחלק שלל תחת אשר הערה למות נפשו ואת פושעים נמנה והואה חטאי רבים נשא ולפשעיהמה יפגע 1Q8לכן [אחלק] עצומים [יחלק] שלל תחת אשר הערה למות [נפשו] נמנה [חטאי] רבים נשא ולפשעיהם יפגיע 4Q58[לכן] אחלק לו ברבים ואת עצמים יחלק שלל תחת [אשר] נפשו ואת פשעים נמנה והוא חטאי רבים נשא [ולפשעיהם]