Исаии, глава 62
Нажмите на слово — откроется его разбор: чтение, значение, номер Стронга и грамматическая форма. Номер стиха ведёт в подстрочный перевод; наведите на него мышь — стих покажется здесь же.
1МТלְמַ֤עַן צִיּוֹן֙ לֹ֣א אֶחֱשֶׁ֔ה וּלְמַ֥עַן יְרוּשָׁלִַ֖ם לֹ֣א אֶשְׁק֑וֹט עַד יֵצֵ֤א כַנֹּ֙גַהּ֙ צִדְקָ֔הּ וִישׁוּעָתָ֖הּ כְּלַפִּ֥יד יִבְעָֽר 1Qisaaלמען ציון ולוא אחריש ולמען ירושלים לוא אשקוט עד יצא כנוגה צדקה וישועתה כלפיד תבער
2МТוְרָא֤וּ גוֹיִם֙ צִדְקֵ֔ךְ וְכָל מְלָכִ֖ים כְּבוֹדֵ֑ךְ וְקֹ֤רָא לָךְ֙ שֵׁ֣ם חָדָ֔שׁ אֲשֶׁ֛ר פִּ֥י יְהוָ֖ה יִקֳּבֶֽנּוּ 1Qisaaוראו גואים צדקכי וכול מלכים כבודך וקראו לך שמ חדש אשר פי יהוה יקובנו
3МТוְהָיִ֛יתְ עֲטֶ֥רֶת תִּפְאֶ֖רֶת בְּיַד יְהוָ֑ה וּצְנִ֥יף מְלוּכָ֖ה בְּכַף אֱלֹהָֽיִךְ 1Qisaaוהיית עטרת תפארת ביד יהוה וצנופ מלוכה בכפ אלוהיךי 1Q8והיית [עטרת] [תפארת] ביד יהוה צנוף מלכה בכף [אלהיך]
4МТלֹֽא יֵאָמֵר֩ לָ֨ךְ ע֜וֹד עֲזוּבָ֗ה וּלְאַרְצֵךְ֙ לֹא יֵאָמֵ֥ר עוֹד֙ שְׁמָמָ֔ה כִּ֣י לָ֗ךְ יִקָּרֵא֙ חֶפְצִי בָ֔הּ וּלְאַרְצֵ֖ךְ בְּעוּלָ֑ה כִּֽי חָפֵ֤ץ יְהוָה֙ בָּ֔ךְ וְאַרְצֵ֖ךְ תִּבָּעֵֽל 1Qisaaולוא יאמר לכי עוד עזובה ולארצך לוא יאמר עוד שוממה כיא לכי יקראו חפצי בהא ולארצך בעולה כיא חפץ יהוה בכי וארצכ תבעל
5МТכִּֽי יִבְעַ֤ל בָּחוּר֙ בְּתוּלָ֔ה יִבְעָל֖וּךְ בָּנָ֑יִךְ וּמְשׂ֤וֹשׂ חָתָן֙ עַל כַּלָּ֔ה יָשִׂ֥ישׂ עָלַ֖יִךְ אֱלֹהָֽיִךְ 1Qisaaכיא כבעול בחור בתולה יבעלוכי בניך ומשוש חתן על כלה ישיש עליך אלוהיך
6МТעַל חוֹמֹתַ֣יִךְ יְרוּשָׁלִַ֗ם הִפְקַ֙דְתִּי֙ שֹֽׁמְרִ֔ים כָּל הַיּ֧וֹם וְכָל הַלַּ֛יְלָה תָּמִ֖יד לֹ֣א יֶחֱשׁ֑וּ הַמַּזְכִּרִים֙ אֶת יְהוָ֔ה אַל דֳּמִ֖י לָכֶֽם 1Qisaaעל חומותיך ירושלים הפקדתי שומרים כול היום וכול הלילה לוא יחשו המזכירים את יהוה אל דמי לכמה 1Q8על חמתיך ירושלם [הפקדתי] שמרים כל [לילה] לא יחשו [המזכירים] [את] יהוה אל דמי לכם
7МТוְאַֽל תִּתְּנ֥וּ דֳמִ֖י ל֑וֹ עַד יְכוֹנֵ֞ן וְעַד יָשִׂ֧ים אֶת יְרֽוּשָׁלִַ֛ם תְּהִלָּ֖ה בָּאָֽרֶץ 1Qisaaואל תתנו דמי לו עד יכין ועד יכונן ועד ישים את ירושלימ תהלה בארץ 1Q8ואל תתנו דמי לכם [עד] [ישים] את תהלה בארץ
8МТנִשְׁבַּ֧ע יְהוָ֛ה בִּֽימִינ֖וֹ וּבִזְר֣וֹעַ עֻזּ֑וֹ אִם אֶתֵּן֩ אֶת דְּגָנֵ֨ךְ ע֤וֹד מַֽאֲכָל֙ לְאֹ֣יְבַ֔יִךְ וְאִם יִשְׁתּ֤וּ בְנֵֽי נֵכָר֙ תִּֽירוֹשֵׁ֔ךְ אֲשֶׁ֥ר יָגַ֖עַתְּ בּֽוֹ 1Qisaaנשבע יהוה בימינו ובזרוע עוזו אמ אתן עוד דגנך מאכל לאוביך אמ ישתו בני נכר תירושך אשר יגעתי בוה 1Q8נשבע יהוה [בימין] עזו אם אתן עוד את דגנך מאכל [לאיביך] ואם ישתו [תירושך] אשר יגעת בו
9МТכִּ֤י מְאַסְפָיו֙ יֹאכְלֻ֔הוּ וְהִֽלְל֖וּ אֶת יְהוָ֑ה וּֽמְקַבְּצָ֥יו יִשְׁתֻּ֖הוּ בְּחַצְר֥וֹת קָדְשִֽׁי 1Qisaaכיא אמ מאספוהי יאכולוהי ויהללו את שמ יהוה ומקבצו ישתוהי בחצרות קודשי אמר אלוהיך 1Q8[כי] מאספיו יאכלהו והללו [את] יהוה [ומקבציו] [ישתהו] בחצרת
10МТעִבְר֤וּ עִבְרוּ֙ בַּשְּׁעָרִ֔ים פַּנּ֖וּ דֶּ֣רֶךְ הָעָ֑ם סֹ֣לּוּ סֹ֤לּוּ הַֽמְסִלָּה֙ סַקְּל֣וּ מֵאֶ֔בֶן הָרִ֥ימוּ נֵ֖ס עַל הָעַמִּֽים 1Qisaaעבורו בשערים פנו דרך העם סולו סולו המסלה סקולו מאבן הנגף אמורו בעמים 1Q8[עברו] עברו בשערים פנו דרך העם סלו סלו המסלה סקלו אבן [נס] על העמים
11МТהִנֵּ֣ה יְהוָ֗ה הִשְׁמִ֙יעַ֙ אֶל קְצֵ֣ה הָאָ֔רֶץ אִמְרוּ֙ לְבַת צִיּ֔וֹן הִנֵּ֥ה יִשְׁעֵ֖ךְ בָּ֑א הִנֵּ֤ה שְׂכָרוֹ֙ אִתּ֔וֹ וּפְעֻלָּת֖וֹ לְפָנָֽיו 1Qisaaהנה יהוה השמיעו אל קצוי הארץ אמורו לבת ציון הנה ישעך בא הנה שכרו אתו ופעלתיו לפניו
12МТוְקָרְא֥וּ לָהֶ֛ם עַם הַקֹּ֖דֶשׁ גְּאוּלֵ֣י יְהוָ֑ה וְלָךְ֙ יִקָּרֵ֣א דְרוּשָׁ֔ה עִ֖יר לֹ֥א נֶעֱזָֽבָה 1Qisaaוקראו להמה עמ הקודש גאולי יהוה ולכי יקראו דרושה עיר לוא נעזבה